Биринчи хусусий ОТМ ҳужжатлар қабул қилишни бошлади.

Ўзбекистондаги биринчи хусусий олий таълим муассасаси — Тошкент шаҳридаги Ёжу техника институти 2018/2019-ўқув йили учун абитуриентлардан ҳужжатларни қабул қилишни бошлади. Қабул 31 августгача давом этади. Бу ҳақда институтнинг ytit.uz сайтида хабар берилган.  

Жанубий Кореянинг ушбу институтига республикамиз ва хориждаги ўрта таълим мактаб, академик лицей ва коллежни тугатган ёшлар қуйидаги йўналишларга ҳужжат топшириши мумкин: 

— архитектура ва шаҳарсозлик;

— қурилиш;

— муқобил энергия;

— бизнесни бошқариш;

— туризм.

Кириш имтиҳонлари 7-8 сентябрь кунлари бўлиб ўтади.

Имтиҳонлар муқобил энергия йўналиши бўйича — физика ва инглиз тили фанидан, қолган йўналишлар бўйича математика ва инглиз тилидан бўлиб ўтади. Имтиҳон саволлари Ўзбекистон ва Жанубий Корея таълим стандартлари асосида тайёрланган.

IELTS даражасининг камида (минимум) 5.0 балл ёки TOEFL IBT даражасининг 50 балли сертификатига эга абитуриентлар инглиз тили фанидан имтиҳондан озод этилади.

Ҳужжатларни институт сайтида онлайн тарзда топшириш мумкин.

Ёжу техника институтида 2018/2019-ўқув йили учун ўқув-шартнома пули йўналишга қараб 16 миллиондан 24 миллион сўмгача белгиланган.