Бугун оилаларда эркакларнинг ўрни камайиб кетаётгандай назаримда. Аёлларнинг ҳуда-беҳуда дийдиёлари ортиқча исрофгарчилик, сарф-харажатларга сабаб бўлаётганини эркак жимгина кузатиб туриши мумкинми?

Водий томонларда қиз чиқаришни эслатиб ўтиш жуда ҳам ўринли, деб биламан. Зеро, муаммонинг нуқтаси мана шу бўлса керак. Қиз фарзандли бўлиши билан унинг сепини йиғишни бошлайдиган бизнинг халқимиз бу борада жуда ҳам ўзиб кетди. Куёв томон ҳам ўз масъулиятини унутди шекилли, барча сарф-харажатларни келин томонга ағдариб қўйди. Куёвнинг бошдан-оёқ тўрт фасллик кийимидан тортиб, то уй жиҳозлари-ю уч ёки тўрт хона уйни безатиш ҳам келиннинг зиммасида ҳозир. Бу қандай ҳолат бўлди? Наҳот, йигитларимиз оила масъулиятини эсдан чиқарган бўлишса?

Энди бир тасаввур қилиб кўринг! Агар икки ёки уч қизи бор инсон тўй қилмоқчи бўлса, умрини чет элда пул топиш билан ўтказишга тўғри келмоқда. Ота-она фарзандига тарбия бериш ўрнига қизи учун чет элнинг мебелини қиламан, деб куну тун ишлашига тўғри келмоқда. Натижада фарзанд тарбиясига эътибор камаймоқда.

Бу ҳолатда фақат аёлларни айблаш ноўрин, албатта. Қарс икки қўлдан чиқади. Аёлларимиз бу борада ишбилармонлик қилишлари, сарф-харажатни камайтириш учун келишувга эришишлари, бўлажак қайноналар эса қиз фарзанд ўстирганни қийин аҳволга солмаслик учун ҳаракат қилишлари жуда ҳам зарур.

Фарзанд учун энг муҳим нарса бу унинг тарбияси, хулқ-атвори, ҳаёси экани, шубҳасиз. Ота-оналар қизларига мана шу нарсаларни сеп қилиб беришса, бундан ортиқ бахт-саодат бўлмаса керак.

Темурбек АДҲАМЖОНОВ