— Бир ўқитувчига энг кўп неча дарс соати берилиши мумкин? Олис ҳудудларда, тоғли туманларда жойлашган мактаблар ёки мутахассислар етишмайдиган, икки сменали мактабларда ўқитувчиларга энг кўп неча соатгача дарс ўтишга рухсат берилади?

Б.НИЁЗОВ,

ўқитувчи, Сариосиё тумани

— Ўзбекистон Республикаси Вазирлар Маҳкамасининг 2005 йил 21 декабрдаги қарори билан тасдиқланган «Халқ таълими ходимлари меҳнатига ҳақ тўлаш тўғрисидаги низом»нинг 18-бандига кўра, алоҳида ҳолларда халқ таълими муассасаларида ходимнинг розилиги билан касблар (лавозимлар)ни бирга қўшиб олиб боришга, шунингдек, ўзининг асосий иши билан бирга, ишда вақтинча бўлмаган ходимларнинг вазифаларини бажаришга йўл қўйилади. Бунда лавозимларни бирга қўшиб олиб бориш бўйича иш вақтининг жами давом этиши йиллик 1548 соат иш вақтининг 50 фоизидан, яъни йил мобайнида 774 соатдан ортиқ бўлиши мумкин эмас.

Шунингдек, ҳукуматнинг 2012 йил 18 октябрдаги қарори билан тасдиқланган «Ўриндошлик асосида ҳамда бир неча касбда ва лавозимда ишлаш тартиби тўғрисида низом» иловасининг 6-бандига мувофиқ, умумтаълим мактаблари ўқитувчиларининг айнан шу муассасада белгиланган меҳнат нормасидан ортиқ бўлган, лекин ушбу иш тури бўйича иш вақти нормал давомийлигининг 50 фоизидан кўп бўлмаган иши ўриндошлик асосида ишлаш ҳисобланмайди ҳамда улар меҳнатига тасдиқланган тарификация асосида ҳақ тўланади.

Халқ таълими вазирлиги

ахборот хизмати