— Яқинда ўн тўққиз ёшга кирдим. Тўғриси, исмим ўзимга ёқмайди. Ота-онам ҳам исмимни ўзгартиришимга рози.

Бу борада қайси ташкилотга мурожаат қилишим керак?

Норбуви МУХОНОВА,

Ўрта Чирчиқ тумани

— Ўзбекистон Республикаси Оила кодексининг 226-моддасига кўра, фамилия, исм ва ота исмини ўзгартириш ҳақидаги аризаларни ариза берувчи ўн олти ёшга тўлгандан кейин у яшаб турган жойдаги фуқаролик ҳолати далолатномаларини ёзиш органи кўриб чиқади. Бу борадаги хулосани ички ишлар органлари ушбу шахс тегишлича текширувдан ўтказилгандан кейингина тузиши мумкин.

Эслатиб ўтамиз, Ўзбекистон Республикаси Фуқаролик кодексининг 19-моддасига кўра, фуқаронинг ўз исмини ўзгартириши аввалги исми билан олган ҳуқуқ ва бурчларини бекор қилиш ёки ўзгартириш учун асос бўлмайди. Фуқаро ўз исмини ўзгартирганлиги ҳақида қарздорлари ва кредиторларига хабар бериш учун зарур чораларни кўриши шарт, у мазкур шахсларда фуқаронинг исми ўзгарганлиги ҳақида маълумот йўқлиги туфайли келиб чиқиши мумкин бўлган оқибатлар хавфини ўз зиммасига олади.

Исмини ўзгартирган фуқаро аввалги исмига расмийлаштирилган ҳужжатларга ўз ҳисобидан тегишли ўзгартиришлар киритилишини талаб қилишга ҳақли.

Бошқа шахс исмидан фойдаланиб ҳуқуқ ва бурчларга эга бўлишга йўл қўйилмайди.

Саволга Тошкент шаҳар Шайхонтоҳур тумани 2-давлат нотариал идораси нотариуси

Камола ЖЎРАБОЕВА

жавоб берди.