«Оила даврасида» газетасининг 11 август сонида эълон қилинган «Келин сандиғига солинган диплом» сарлавҳали мақолада бугун кўпчилик оилада учрайдиган муаммо ҳақида сўз юритилибди.

Фикримча, келин ишласа, бунда ҳеч бир ёмон хосият йўқ. «Аёл ишламаслиги керак», деган қоидани ўрнатган оилаларни кўриб, очиғи, ҳайрон бўламан. Ҳатто айримлардан: «Келин оилада бола туғиб бериш, оиланинг хизматини қилиш учунгина керак», деган фикрни ҳам эшитганман. Очиғи, бундай гаплар фақат калтабинлик оқибатида келиб чиқади, деб ўйлайман.

Келин ишлаб, рўзғорга моддий ёрдам берса, турмуш ўртоғига маслаҳатгўй бўлса, бунинг нимаси ёмон? Айримларнинг: келиним ишласа, невараларимга вақт ажратолмайди, деб ўйлаши табиий ҳол. Лекин агар қайнота-қайнона (буви-бобо)ларимиз ёрдамини аяшмаса, ҳар қандай келин фарзанд қаровини ҳам, ишини ҳам эплай олади. Ёш оилага ҳар томонлама кўмак бериш катталарнинг вазифаси-ку, ахир.

Бир тасаввур қилинг, нафақат ўғлингиз, балки келинингиз ҳам нуфузли жойда ишласа, уларнинг ютуғи оилангиз шаънини кўкка кўтаради, невараларингиз келажаги учун мустаҳкам таянч, жамият тараққиётига қўшилган муносиб ҳисса бўлади. Шундай оилаларни кўриб, кишининг ҳаваси келади.

Лекин оиланинг моддий таъминотини аёлнинг елкасига илиб қўйиш ҳам ярамайди. Касб-ҳунарсиз турмуш ўртоғи ва икки фарзанди билан ижарада яшаб, эрта-ю кеч ишлайдиган аёлни танирдим. Унинг ҳолатини кўриб, бу оиланинг келажагини тасаввур қилишга қўрқардим. Шуни унутмаслик керакки, аёл ишлаб, пул топса, бу фақат кўмак учун. Оиланинг асосий моддий таъминоти ҳар қандай ҳолатда ҳам эркакнинг зиммасида. Шундай экан, бегона муҳитга мослашмаган оиланинг янги аъзосини ишлашга ёки севимли ишидан бўшашга мажбур қилмаслик керак. Аксинча, унинг хоҳишини инобатга олиб, кўмаклашиш зарур. Муроса билан чиқарилган қарор яхши натижага олиб келади.

Қаҳҳор МИРЗАПЎЛАТ,

Фарғона вилояти