кимларга берилади, кимларга эса йўқ?

​Олий таълим муассасаларида янги ўқув йили бошланиши билан мамлакатимизнинг турли вилоятларидан пойтахтимизга келган талабаларнинг турар жойга эҳтиёжи ошади.

Бугун олийгоҳларимиздаги талабалар турар жойи замонавий таъмирланган, кўрганда кўзингиз қувнайди. Хуллас, мавжуд шароитларининг кўп қаватли уйлардан деярли фарқи йўқ.

Шу кунларда таҳририятимизга талабалар ва ота-оналардан бу борада кўплаб савол-мурожаатлар бўлмоқда. Шуни инобатга олиб, Ўзбекистон Республикаси Олий ва ўрта махсус таълим вазирлигига мурожаат этдик. Вазир ўринбосари Мираббос ИНОЯТОВ имзоси билан келган хатда саволларимизга қуйидаги жавоблар баён этилган.

— Талабалар турар жойига жойлашишда бирон талаб ва мезонлар борми? У қандай тартибда амалга оширилади?

— Олий таълим муассасасида талабалар турар жойи узоқ туман ва вилоятлардан келиб таълим олаётган талабаларни вақтинча яшаш жойи билан таъминлаш ҳамда талабаларнинг билим олишига шароит  яратиб бериш мақсадида ташкил этилади. Талабалар турар жойининг бошқаруви — Низом асосида олий таълим муассасаси раҳбарияти томонидан ички тартибда шакллантирилади.         

Талабалар турар жойида истиқомат қилиш истагини билдирган талаба ўзи таҳсил олаётган факультет декани номига ариза ёзади. Аризани масъул ходимлар ўрнатилган тартибда кўриб чиққач, талабага яшаш учун жой берилади.

— Айни пайтда талабалар турар жойидан жой олиш учун талаба ўн ой учун олдиндан тўловни амалга ошириши талаб этилаётган экан. Бу қай даражада тўғри? Талаба, айниқса, тўлов-шартнома асосида таҳсил оладиган талабанинг ўқиш пулига ётоқхонада ҳам туриш кирмайдими?

— Талабанинг молиявий имкониятидан келиб чиқиб, тўловларни ойма ой ёки ўн ойга амалга ошириш мумкин. Тўлов шартнома асосида таҳсил олаётган талабанинг ўқиш пулига талабалар турар жойида яшаш харажатлари киритилмаган.

— Талабалар турар жойи учун тўлов неча сўм? Ушбу сумма ҳамма олийгоҳларда бир хилми? Агар фарқли бўлса, нима асосида белгиланади?

— «Талабалар турар жойи тўғрисидаги Низом»га асосан ҳамда бинонинг сарф-харажатларидан келиб чиқиб, сумма олий таълим муассасасининг тегишли қарорлари асосида белгиланиши мумкин.

— Талаба турар жойи учун йиғилган пуллар қандай мақсадларга ишлатилади?

— Талабалар турар жойида яшаш учун тўланган пул етарлилигига қараб, бинони сақлаш ва бошқа шу билан боғлиқ харажатларга йўналтирилади.

— Магистратура босқичида ўқийдиган талабалар турар жой билан таъминланадими?

— Агар талабалар турар жойида жой етарли бўлса, магис­тратура босқичида ўқийдиган талабалар ҳам турар жой билан таъминланади.

Шаҳобиддин РАСУЛОВ

ёзиб олди.