Халқимизнинг кўп яхши хислатлари бор, меҳмондўст, самимий, меҳнаткаш... Аммо атроф-муҳитга бўлган муносабатимизни яхши деб бўлмайди, табиатни асраш хислатимизни ҳали-ҳамон шакллантира олмаяпмиз.

Буни юртимизнинг исталган кўчаларини кезиб, йўлакларда, ариқларда ётган турли чиқиндилар мисолида кўриш мумкин. Ариқлар, йўл чеккалари, умуман белгиланмаган жойларда уюм-уюм бўлиб ётган озиқ-овқат маҳсулотларининг қоғозлари, баклажкалар, целлофан пакетларга кўзимиз ҳам ўрганиб қолди, юртимиз учун одатий манзарага айланди. Чиқинди қутисигача икки қадам юриш кифоя бўлса ҳам эринамиз, исталган жойга улоқтирамиз. Натижада атроф-муҳит тобора чиқиндихонага айланиб бормоқда.

Чиқиндилар сектори иқлим ўзгариши, биологик хилма-хиллик нобуд бўлиши ҳамда атроф-муҳитнинг ифлосланишига сабаб бўлмоқда. Ушбу чиқиндиларнинг аксариятини пластик ва полиэтиленлар ташкил этаётгани эса бу борадаги хавотирни янада оширяпти. Негаки, бу турдаги чиқиндиларнинг табиий шароитда йўқ бўлиб кетиши жуда узоқ вақт талаб қилади.

Шу боисдан табиат мусаффолигини сақлаш ва аҳолининг экологик маданиятини ошириш мақсадида Ўзбекистон Экологик партияси томонидан тез-тез плоггинг тадбирлари ўтказилади. Плоггинг – бу ҳам югуруш спорти, ҳам чиқинди йиғиш тадбири. Бу гал барча партия ташкилотлари томонидан 1 — 10 апрель кунлари давомида плоггинг акцияси ўтказилмоқда.

Бухоролик ёшлар Экобоғда

Ўзбекистон Экологик партияси Бухоро вилоят кенгаши томонидан Экобоғда кўнгилли ёшлар иштирокида бир вақтнинг ўзида иккита ташаббус – «Яшил макон» умуммиллий лойиҳаси ҳамда плоггинг акциялари ўтказилди.

Унда Олий Мажлис Қонунчилик палатаси депутати, партия Марказий Кенгаши раиси ўринбосари Камол Жуманиёзов мазкур лойиҳалардан кўзланган мақсад ҳақида маълумот бериб ўтди.

Экобоғ ҳудудида ёшлар иштирокида 100 дан ортиқ иқлим шароитига мос келадиган манзарали кўчатлар экилди. Соҳа вакиллари кўчатларни суғориш, парвариш­лаш ва касалланишига қарши курашиш бўйича бир қатор тавсиялар бериб ўтди.

Тадбирнинг иккинчи босқичида, ёшлар югуриш мусобақаси давомида боғ ҳудудини чиқиндилардан тозалашди. Қоғоз, картон ва босма қоғоз, полиэтилен пакетлар ва пластик, шиша ва алюмин идишлар каби турларга ажратиб, сараланган чиқиндилар махсус чиқиндиларни етказиб бериш машиналарида қайта ишлаш цехларига юборилди. Бу эса, уларни қайта ишлаш ҳамда фойдали маҳсулотга айлантиришнинг муқобил ечимидир.

Қайд этиш лозим, амалга оширилаётган бу каби эзгу ишлар ёшларни она табиатни асрашга ундаши билан аҳамиятлидир. Лойиҳалар якунида фаол иштирокчиларга партиянинг эсдалик совғалари топширилди.

Олам чиқиндиларсиз янада гўзал!

Ушбу тадбир аҳамиятини англаган ҳолда Самарқанд вилоят партия ташкилоти томонидан ҳам ҳудудларда плоггинг тадбирлари ўтказилмоқда. Негаки, бугунги кундаги глобал иссиқлик, атроф-муҳитимиз, умуман экологиянинг ифлосланиши, биохилма-хилликнинг йўқолиб бориши каби долзарб масалаларнинг асосида ҳам чиқинди муаммоси йўқ эмас. «Плоггинг» акциясини ўтказиш орқали эса шаҳар инфратузилмасини яхшилаш, аҳоли саломатлиги учун қулай экологик муҳит яратишга ҳисса қўшган бўламиз. Шунингдек, ушбу тадбирлар чиқинди муаммосини бартараф этиш, атмосфера мусаффолигига эришиш, аҳоли ва ёшлар ўртасида экологик маданиятни оширишда ҳам муҳим жараёндир.

Акцияда Ўзбекистон Экологик партияси Самарқанд вилояти ҳамда туман (шаҳар) кенгашлари раислари, Ўзбекистон Ёшлар иттифоқи вилоят кенгашининг экофаол ёшлари, Ўзбекистон нодавлат нотижорат ташкилотлари миллий ассоциацияси Самарқанд бўлими, «Мароқанд Обод» ДУК ходимлари, партиядан сайланган депутатлар ва жамоатчилик вакиллари қатнашди.

Иштирокчилар тўрт гуруҳга бўлинган ҳолда катта ҳудудни полиэтилен пакет, картон, шиша идишлар сингари маиший чиқиндилардан тозалашди. Акция давомида иштирокчилар чиқиндиларни турларга ажратиб йиғишди ва қайта ишлашга топширишди. Акция сўнгида фаол гуруҳ аъзолари Экопартия Самарқанд вилоят партия ташкилотининг эсдалик совғалари ва ташаккурномаси билан тақдирланди.

Яшил тараққиёт учун бирлашаётган ёшлар

Навоий вилояти Кармана туманида «Биз ёшлар – яшил тараққиёт учун бирлашайлик» шиори остида экологик плоггинг акцияси ўтказилди.

Акция давомида ёшлар Кармана тумани «Боғишамол» маҳалласи атрофини чиқиндилардан халос этишди. Бундай лойиҳалар ёшларимизни табиатга бўлган меҳрини оширишга, атроф-муҳитни асраб-авайлашга чорлайди.

Бу каби плоггинг тадбирлари юртимизниг барча ҳудудларида қизғин давом этмоқда. Ўзбекистон Экологик партияси масъуллари ва кўнгилли ёшлар томонидан бепарволикданми ёки дангасаликдан ташлаб кетган чиқиндиларимиз йиғиб олиняпти. Инсоният табиатида агар бошқа одам унинг айбини беркитса, кейинги сафар такрорламаслик ва уялиш ҳисси бўлади. Ўйлаймизки, ўтказилган мазкур тадбир ҳам кўпчиликка ўзининг ижобий таъсирини ўтказади.

Ўз мухбиримиз