Кўплаб мамлакатларда ҳар йили 15 апрель – Халқаро экологик билимлар куни сифатида нишонланади.

БМТнинг 1992 йил 15 апрель куни Рио-де-Жанейро шаҳрида бўлиб ўтган атроф-муҳит муаммолари муҳокамасига бағишланган конференциясида инсоният ҳаёти ва барқарорлиги учун экологик тарбиянинг улкан аҳамияти алоҳида қайд этилган ва ушбу санани Экологик билимлар куни сифатида нишонлаш таклиф этилган эди.

Бу кундан мақсад экологик билимларни тарғиб қилиш, экологик маданиятни шакллантириш, шунингдек, долзарб экологик муаммолар ва атроф-муҳит ҳолати тўғрисида хабардор қилишдир.

Ёшлар қандай фикрда?

Дарҳақиқат, сайёрамизнинг келажаги ёш авлоднинг экологик маданиятига боғлиқ. Буни Ўзбекистон Экологик партияси ҳам тўла англаган ҳолда ҳудудларда экологик маданият, табиатни асраш борасида давра суҳбатлари, тарғибот тадбирларини ўтказмоқда. Негаки, экологик муаммоларни фақат миллий ва глобал миқёсда биргаликдаги саъй-ҳаракатлар орқалигина ҳал қилиш мумкин. Сана муносабати билан ташкил этилган бир қатор тадбирларда ҳам бу алоҳида қайд этилди.

Экопартиянинг Учтепа туман кенгаши ҳамда Жаҳон тиллари университети ҳамкорлигида Экологик билимлар куни муносабати билан тадбир ташкил қилинди. Унда Олий Мажлис Қонунчилик палатаси депутатлари Носир Аминов ва Муқаддас Тиркашева талаба-ёшларга бугунги кунда экологик муаммоларнинг нақадар долзарблиги, пойтахтимизда ушбу муаммонинг олдини олиш чоралари, экологик маданиятни шакллантириш борасида тушунчалар беришди. Ёшларнинг кўплаб саволларига жавоб қайтаришди.

«Ота-боболаримиз Ватанни, она табиатни асраш муқаддас бурч эканлигини доимо эътироф этиб келишган. Экологик таълим-тарбия табиат ва жамият ўртасидаги узвийликни таъминлашда муҳим аҳамиятга эга. Энг муҳими, экологик таълим-тарбия ёшларни табиатдан онгли равишда фойдаланиш билан бирга, улар қалбида табиатга меҳр-муҳаббат уйғотади, йигит-қизларни тежамкорликка ўргатади», дейди Олий Мажлис Қонунчилик палатаси депутати Носиржон Аминов.

Тадбир давомида анъанага мувофиқ, «Яшил макон» умуммиллий лойиҳаси доирасида 30 туп манзарали дарахт кўчатлари экилди.

Ёшларнинг экологик билимини оширишга қаратилган давра суҳбатлари Ўзбекистон Экологик партияси Бухоро вилоят ҳамда шаҳар кенгашлари томонидан Бухоро давлат тиббиёт институти қошидаги академик лицейда, Экопартия Хоразм вилоят кенгаши вакиллари томонидан Урганч давлат педагогика институтида, партиянинг Сурхондарё вилоят кенгаши томонидан Термиз муҳандислик-технология институтида ҳам ташкил этилди.

Мулоқотлар давомида иштирокчиларга бугунги кунда олиб борилаётган экологик лойиҳалар, уларнинг мазмун-моҳияти, ёш авлодда экологик билимларни шакллантириш, она табиатга нисбатан меҳр уйғотиш масалалари, шунингдек, бу борада Экопартия томонидан амалга оширилаётган чора-тадбирлар хусусида сўз юритилди. Зотан Экомаданиятнинг шаклланиши келажак авлод саломатлигини асраш гаровидир!

Ўзбекистон Экологик партияси

Марказий кенгаши Матбуот хизмати