Олий аттестация комиссиясида геология-менерология фанлари йўналишида олий малакали илмий ва илмий-педагог кадрлар аттестацияси ҳамда илмий кенгашлар фаолияти самарадорлигини ошириш масаласи муҳокама этилди.

Бугунги кунда геология-минералогия фанлари бўйича республикамиздаги олий таълим муассасалари ҳамда илмий тадқиқот марказларида 10 та илмий кенгаш фаолият кўрсатмоқда.

– Мамлакатимиз ер юзида маълум барча фойдали қазилмаларга бой замин, – дейди техника фанлари доктори, профессор Абдурашид Ҳасанов. – Шу боис минерал-хомашё ресурсларидан самарали фойдаланиш йўналишини илм билан ривожлантириш мақсадида лойиҳа офиси ташкил этиб, етакчи институт ва илмий марказлар жалб қилинмоқда. Бунда ёш олимларни қўллаб-қувватлаш, соҳага илғор хорижий тадқиқот методларини жорий қилишга катта аҳамият қаратилаётгани эътиборга молик.

Йиғилишда олий малакали илмий ва илмий-педагогик кадрлар соҳасидаги кенг кўламли ислоҳотлар хусусида ахборот берилиб, навбатдаги вазифалар белгилаб олинди.

Хусусан, Янги Ўзбекистонни барпо этиш борасида олиб борилаётган кенг кўламли ислоҳотларга ҳамоҳанг тарзда амалга оширилаётган илмий-тадқиқот ишлари, уларнинг сифатини ошириш, ахборот тизимини такомиллаштириш, инновацион ва илғор халқаро тадқиқот услубларини амалиётга жорий этиш каби масалалар кенг муҳокама этилди.

Шунингдек, жаҳонда тез ўзгараётган технологик вазият боис «яшил» энергетика, электротехника саноатида камёб металларга талаб тобора ортиб бораётган бугунги шароитда минерал хомашё базасидан фойдаланишда илм-фаннинг аҳамиятини ошириш, аниқланган захиралар ва фойдали қазилмаларни қазиб олишга инновацион технологияларни жорий этиш орқали мамлакат иқтисодиётини юксалтириш борасидаги илмий изланишлар давр талаби экани таъкидланди.

ОАК Ахборот хизмати