– Сайловолди дастурида мамлакатимизда ер-сув ресурсларидан оқилона фойдаланишга эришишга қаратилган мақсадлар айниқса эътиборимни тортди.

Бугунги кунда қишлоқ хўжалиги соҳаси вакиллари иқлим ўзгариши оқибатларидан энг кўп азият чекмоқда, десак хато бўлмайди.
Қишлоқ хўжалигида ҳар йили қанчадан-қанча майдонлар яроқсиз ҳолга келиб, фойдаланишдан чиқиб кетади. Партиямиз мана шундай ер майдонларини қайта фойдаланишга киритиш бўйича аниқ механизмларни таклиф этяпти. Жумладан, қишлоқ хўжалиги экинларини етиштириш учун ерларни экишга тайёрлашда ресурс ва энергия тежамкор, экологияга безарар бўлган «No-TiLL» (ерга минимал ишлов бериш) каби инновацион технологиялар масаласини олайлик. Ривожланган мамлакатларнинг аксарияти аллақачон шу усулдан фойдаланмоқда. Ернинг озуқавий қатламидан унумли фойдаланиб, камроқ ишлов бериб, кўпроқ ва унумли ҳосил олишга эришяпти. Биз эса ҳалигача ерни қанчалик чуқур ағдарсак, ҳосилдорлик шунча яхши бўлади, деган бирёқлама қараш билан қишлоқ хўжалиги маҳсулотларини етиштиряпмиз. Аммо афсуски йилига қанча гектарлаб ер майдонларимиз яроқсиз аҳолга келиб қоляпти. Партиямиз илгари сураётган юқоридаги каби инновацион технологияларни татбиқ этиш вақти аллақачон етган.
Саноатда энергия тежамкор технологияларни жорий этиш орқали энергия сарфини 50 фоизга қисқартириш, 2030 йилгача энергия балансида тоза ва қайта тикланадиган энергия манбалари улушини икки карра ошириш таклифи ҳам бугунги куннинг асосий масалаларидан биридир. Атроф-муҳитга меъёрдан ортиқча ифлослантирувчи моддаларни чиқарганлик учун компенсация тўловларини 5-10 баробаргача оширишни ҳам албатта самарали чора сифатида баҳолайман.
Бутун дунёда биохилма-хиллик камайиб бораётганини инобатга олиб, дастурда биологик хавфсизликни таъмин­лашда амалга оширилиши долзарб бўлган бир қатор ташаббуслар илгари сурилмоқда. Камёб ва йўқолиб кетиш хавфи остида турган ҳайвонларни овлаш ва ўсимлик турларини табиатдан ажратиб олишга мораторий эълон қилиш, браконьерлик ҳамда ҳайвонот ва ўсимлик дунёси контрабанда савдосини чеклаш бўйича кескин чоралар кўришга оид мақсадлар шулар жумласидандир.
Сайловолди дастурида 2030 йилдан пойтахт ва йирик шаҳарларда ички ёнув двигателли енгил автомобиллар ҳаракатини, 2035 йилдан эса мамлакатда уларнинг сотилишини тақиқлашни, шунингдек, 2035 йилгача автомобилсозлик саноатини тўлиқ электромобиль ишлаб чиқаришга ихтисослаштиришни таклиф этяпти. Ўйлайманки, жамоатчилигимизнинг, қолаверса, бугунги экологик эҳтиёжимиз талаби шу.
Албатта, бу вазифаларни рўёбга чиқариш, халқимиз ва келажак авлод учун муносиб турмуш шароитларини яратишда ҳамда фаровон жамият барпо этишда дастуриламал бўлади.

Алишер ШУКУРОВ,
Қишлоқ хўжалиги вазири ўринбосари