Севара ФАЙЗИЕВА, ЎЭП Тошкент шаҳар кенгаши раиси, халқ депутатлари Тошкент шаҳар Кенгаши депутати

Сўнгги йилларда мамлакатимизда экология ва атроф-муҳит муҳофазасига давлат миқёсида катта эътибор қаратилаётгани ҳеч кимга сир эмас. Айниқса, пойтахтимиз Тошкент шаҳрида аҳоли сонининг тез ўсиши, автомобиллар оқимининг кескин кўпайиши, чиқиндиларнинг кўпайиши ва ҳаво ифлосланиши каби муаммолар долзарб аҳамият касб этмоқда.

Шаҳардаги асосий экологик муаммолардан бири ҳавонинг ифлосланишидир. Бугун йўллардаги машиналар оқими атмосферага азот оксидлари, углерод газлари ва майда зарраларни чиқармоқда. Бу нафақат шаҳар ҳавоси булғайди, балки аҳоли, айниқса болалар ва кексаларнинг нафас йўллари касалликларига олиб келади. Шу боис пойтахтимизда велосипед йўлакчаларини кўпайтириш, жамоат транспортини ривожлантириш, жумладан, электробуслар ва метро йўналишларини кенгайтириш давлат сиёсати даражасида амалга оширилмоқда.

Тошкентда ҳар куни минглаб тонна маиший чиқиндилар йиғилади. Улар орасида пластик ва полиэтилен миқдори жуда юқори. Агар улар қайта ишланмаса, тупроқ ва сувни ифлослантиради. Бу борада шаҳарда чиқиндиларни саралаш қутилари қўйилиши, қайта ишлаш заводларининг ишга туширилиши ижобий натижалар бермоқда. Аммо бу тизимнинг самарадорлиги фуқароларнинг ҳам фаол иштирокисиз тўлиқ таъминланмайди. Ҳар бир оила чиқиндисини ажратиб ташласа, бу катта экологик ҳисса бўлади.

Сув ресурслари ҳам Тошкент учун муҳим масала. Чирчиқ дарёси ва унинг ҳавзаси орқали шаҳарнинг катта қисми ичимлик сув билан таъминланади. Сувнинг тежалиши ва ундан оқилона фойдаланиш – келажак учун стратегик вазифадир. Давлат томонидан замонавий ирригация технологиялари ва сув тежайдиган ускуналар жорий этилмоқда. Лекин ҳар бир хонадонда оддий қоидага амал қилиш, ҳаттоки оддий жўмракни очиқ қолдирмаслик, ортиқча сув сарфламаслик ҳам катта аҳамиятга эга.

Мен она сифатида яхши биламанки, фарзандимнинг соғлом ўсиши мусаффо ҳаво, тоза сув ва табиий озиқ-овқат билан узвий боғлиқ. Агар табиатга бепарво бўлсак, унинг оқибати авлодларимиз тақдирида ўз аксини топади. Шунинг учун ҳам давлатимиз томонидан «Яшил макон» ҳаракатининг кенг йўлга қўйилиши, чиқиндиларни қайта ишлаш тизимининг ривожланиши, транспорт ифлосланишини камайтириш чоралари мени қувонтиради. Айниқса, мактабларда ва маҳаллаларда ўтказилаётган эко-акциялар болаларнинг онгини шакллантиради. Бу эса жудаям муҳим жараёндир.

Мустақиллик байрами арафасида барчангизни шаҳримизнинг келажаги учун масъулият билан қарашга, табиатни асраб-авайлашга, фарзандларимизни ана шу руҳда тарбиялашга чақириб қоламан.