Жиззах шаҳрида «Яшил келажак сари» шиори остида ўтган йирик экологик тадбир – Ёшлар Экофоруми нафақат вилоят, балки бутун республика миқёсида экологик онгни ошириш, илмий ёндашувларни тарғиб қилиш ва амалий ҳаракатларни бирлаштиришга қаратилган муҳим қадам бўлди.

Форум доирасида соғлом турмуш тарзини тарғиб этиш, аҳолида экологик онгни юксалтириш ҳамда ёшларнинг табиатга муносабатини кучайтиришга қаратилган бир қатор амалий тадбирлар ўтказилди.

Форум Жиззах политехника институти стадионида «5000 қадам юриш» акцияси билан бошланганининг ўзиёқ мазмунли. 250 нафардан ортиқ ёшлар ва фаоллар иштирок этган бу тадбир, экологик ғояларни соғлом турмуш тарзи билан чамбарчас боғлашга хизмат қилади.

Экологик онг ва соғлом ҳаёт тарзи бир-бирини тўлдирувчи тушунчалардир. Жамоатчиликни ҳаракатга чорлаш орқали нафақат саломатликни мус­таҳкамлаш, балки атроф-муҳитга бефарқ бўлмаслик маданияти шакллантирилади.

Акциянинг асосий мақсади – соғлом турмуш тарзини қўллаб-қувватлаш, бир вақтнинг ўзида табиат ва инсон саломатлиги ўртасидаги боғлиқликка эътибор қаратиш бўлди.

Форум доирасида «Иқлим ўзгариши ва барқарор ривожланишда илм-фан ютуқлари» мавзусида респуб­лика илмий-амалий конференцияси ҳам ўтказилди. Олий Мажлис Қонунчилик палатасидаги Ўзбекистон Экологик партияси фракцияси раҳбари Абдушукур Ҳамзаев ўз чиқишида иқлим ўзгариши, чиқиндилар муаммоси ва табиий ресурслардан оқилона фойдаланиш зарурати ҳақида тўхталиб ўтди. Шунингдек, барқарор ривожланишда илм-фан ва инновацион ғояларнинг ўрни катта эканини таъкидлади.

Конференцияда иқтидорли ёшлар экология соҳасидаги янги лойиҳаларини тақдим этдилар. Улар орасида сувни тежовчи тизимлар, қайта тикланувчи энергия манбалари ва чиқиндиларни қайта ишлашга оид ишланмалар бор. Партия ва мутахассислар мазкур лойиҳаларни ҳаётга татбиқ этиш бўйича тавсиялар беришди.

Энергия самарадорлиги, қайта тикланувчи ресурслар ва маҳсулотларнинг экологик хавфсизлигига урғу берилиши – бугунги Ўзбекистон иқтисодиёти учун жуда долзарб. Иқлим муаммоларини фақатгина дарахт экиш билан эмас, балки илмий ёндашув ва ишлаб чиқаришдаги ўзгаришлар орқали ҳал қилиш зарур.

Форум доирасида Шароф Рашидов тумани «Тоқчилик» маҳалласининг 61-мактаб ҳовлисида кўчат экиш акцияси ҳам ўтказилди. Ёшлар томонидан экланган ҳар бир кўчат – бу нафақат яшилланиш, балки табиатга бўлган эътибор ва масъулият рамзи сифатида қабул қилинди.

Анжуман давомида иқтидорли ёшлар томонидан тақдим этилган бир қатор истиқболли лойиҳалар, айниқса, партия вакилларининг бу лойиҳаларни амалиётга жорий этишда ёрдам бериш ва мутахассисларни жалб қилиш ваъдаси – илмий изланишларни реал ҳаётга татбиқ этиш учун мустаҳкам кўприк вазифасини ўтайди.

Шу ўринда таъкидлаш керакки, экологик муаммоларга илмий-инновацион ёндашув барқарор ривож­ланишнинг калитидир. Ёшларни шу жараёнга фаол жалб қилиш, улардаги ғояларни қўллаб-қувватлаш – Ўзбекистоннинг «Яшил келажак» стратегиясини амалга оширишнинг муҳим шартидир.

Форум якунида ёшлар учун экологик кўргазмали дарс ҳам ўтилди. Унда дарахтларнинг инсон ҳаётидаги ўрни, ҳавони тозалашдаги аҳамияти ва атроф-муҳитни муҳофаза қилишга оид маълумотлар берилди.

Саида ИБОДИНОВА,

«Oila va TABIAT» мухбири