Қонунчилик палатасида муҳокамага қўйилган, қонунчиликка киритиш таклиф этилаётган қўшимчалардан бири – Ўзбекистонда экстремистик ташкилотлар рўйхатини шакллантириш масаласи жуда ҳам долзарб. Жамият экстремистик ташкилотлар ҳақида билиши муҳимдир.

Ушбу ташкилотлар номини билган фуқаро адашиб, унинг таъсирига тушиб қолмайди ва у ташкилот ғояларини амалга оширишда иштирок этмайди.

Амалиётдан келиб чиқиб, айрим ташкилотлар давлатда расмий рўйхатдан ўтган ёки ўтмаган бўлиши мумкин. Сўнгиларини аниқлаш осон масала эмас. Жумладан, биринчиси бошқа давлатларда ташкилотни рўйхатга киритиб, бизда маълум бир тузилмаси фаолият олиб бориши. Иккинчиси, юридик шахс ташкил этмаган ҳолда, ягона мақсад учун уюшган шахслар гуруҳи сифатида фаолият олиб бориши.

Ушбу тузилма ва гуруҳларда чет эл фуқаролари, фуқаролиги бўлмаган шахслар ва бизнинг фуқаролар иштирок этиши мумкин. Агарда шундай норасмий ташкилотлар бизда аниқланса, уларга тегишли таъриф бериб, рўйхат орқали кенг оммага маълумот бериш зарур.

Албатта, демократик давлатда расмий ва норасмий ташкилотларни реестрга киритиш, уларнинг фаолиятини чеклаш ва тўхтатиш суд қарори билан амалга оширилади. Худди шундай механизмни бизнинг амалиётимизга киритиш назарда тутилмокда.

Мазкур қонун лойиҳаси экстремизмга қарши курашиш жараёнида фуқароларнинг ҳуқуқларини янада ишончли ҳимоя қилишга ва қонун нормаларини қўллашда суиистеъмолчилик хавфининг олдини олишга хизмат қилиши билан аҳамиятлидир.

Дилдора КАМАЛОВА,

Олий Мажлис Қонунчилик палатаси,

ЎЭП фракцияси аъзоси