Яқинда ижтимоий тармоқларда кенг тарқалган бир лавҳа кўпчиликни ларзага келтирди: ўз хонадони ҳовлисида беғубор ўйнаб юрган кичкина қизалоқ кутилмаганда юз берган кучли портлаш ва ундан чиққан ваҳимали овоз туфайли даҳшатга тушиб, қаёққа қочишини билмай қолади. Бу воқеа шунчаки тармоқдаги навбатдаги пиар видео эмас, балки инсон ҳаётига бўлган беписандликнинг оғриқли ифодасидир.

Жорий йилнинг 15 апрель куни Самарқанд туманидаги машҳур «Оқбўйра» туризм қишлоғи аҳолиси ана шундай кутилмаган ваҳима ва хавф ичида қолди. Маълум бўлишича, ҳудудга яқин жойда тоғ-кон портлатиш ишлари олиб борилган. Бунинг оқибатида одамларнинг ҳаёти ва соғлиғига жиддий хавф туғилган, аҳолининг яшаш уйлари ва мол-мулкига ҳам сезиларли даражада зарар етган. Энг ачинарлиси шундаки, бундай хавфли ва йирик техник жараёндан олдин маҳаллий аҳоли расман огоҳлантирилмаган, хавфсизлик чоралари кўрилмаган.

Мазкур вазият нафақат жамоатчиликнинг, балки халқ вакилларининг ҳам ҳақли эътирозига сабаб бўлди. Ўзбекистон Экологик партиясидан Олий Мажлис Қонунчилик палатаси депутати Ботирали Шодиев ушбу хавфли воқеа юзасидан Тоғ-кон саноати ва геология вазири Бобур Исламовга депутатлик сўрови юборди.

Депутатлик сўровида вазирлик масъуллари ва тегишли назорат органлари олдига соҳадаги камчиликларни очиб берувчи ҳамда келгусида хавфсизликни таъминлашга қаратилган аниқ ва қатъий саволлар қўйилган:

1  Ушбу ҳудудда кон портлатиш ишларида хавфсизликни таъминлаш устидан вазирлик ва тегишли инспекциялар томонидан аслида қандай назорат амалга оширилган?

2 Портлатиш ишларини олиб бориш қоидалари ва техник регламент талабларига амалда риоя қилинганми ёки йўқ?

3 Самарқанд туманидаги ушбу портлаш оқибатида фуқароларнинг уй-жойлари ва мол-мулкига етказилган моддий зарарни аниқлаш ҳамда уни айбдорлар томонидан тўлиқ қоплаб бериш бўйича ҳозирда қандай чоралар кўриляпти?

4 Мазкур манзилда аҳоли хавфсизлигини таъминлаш мақсадида кон портлатиш ишларини қонунчиликка асосан бутунлай тўхтатиш масаласи кўриб чиқиладими?

5 Келгусида республиканинг бошқа ҳудудларида ҳам бундай кўнгилсиз ҳолатларнинг олдини олиш, кон портлатиш технологиясини замонавийлаштириш ва хавфсизлик чораларини кучайтириш бўйича вазирлик томонидан тизимли равишда нима ишлар қилиняпти?

Халқ вакили томонидан йўлланган бу саволлар ўта ўринли ва долзарбдир. Зеро, Янги Ўзбекистонда инсон қадри, унинг осойишталиги ва хавфсизлиги ҳар қандай иқтисодий манфаатдан устувор туради. Одамларнинг ҳаёти ва тинч-тотув яшаб турган уй-жойлари кимларнингдир масъулиятсизлиги сабаб тажриба ўтказадиган майдонга айланиб қолишига асло йўл қўйиб бўлмайди.

Халқ ва жамоатчилик вазирликнинг ушбу сўровга берадиган расмий жавобини ҳамда кўриладиган қатъий чораларини кутиб қолади.

Малика БЕВУТОВА