Янги йил байрамининг тинч-осойишта ва мазмунли ўтишини таъминлаш, халқимиз шод-хуррамлик билан кутиб олиши учун мамлакатимизнинг барча жойларида зарур чоралар кўрилган. Хусусан, пиротехника воситаларининг юртимизга ноқонуний кириши ва савдосига йўл қўймасликка алоҳида эътибор қаратилмоқда.

Қонунчилигимизга кўра, пиротехника буюмларини қонунга хилоф равишда ишлаб чиқариш, тайёрлаш, сақлаш, ташиш, жўнатиш, улардан фойдаланиш, шунингдек, ноқонуний равишда мамлакатимизга олиб кириш ва олиб чиқиш ёки сотиш маъмурий ва жиноий иш қўзғашга асос бўлиши белгиланган.

Ўтган давр мобайнида ноқонуний пиротехника воситаларини бозор ва дўконларда сотиш тугул, уларни мамлакатимиз ҳудудига олиб киришга ҳам деярли барҳам берилди.

Пиротехника воситаларини ноқонуний сақлаш жойлари, уларни хуфиёна сотиш шохобчаларини аниқлаш борасида назорат тадбирлари мунтазам ўтказиб келинмоқда.

Мамлакатимизга пиротехника воситаларини олиб кириш йўлига мустаҳкам қонуний тўсиқ қўйилган. Кўрилаётган бундай чора-тадбирлар халқимиз саломатлиги ва жамоат хавфсизлигини таъминлаш, турли кўнгилсизликларнинг олдини олиш, байрамни тинч ва осойишта ўтказишда муҳим аҳамият касб этади.

Наргиза ЭРКИНОВА,

Тошкент шаҳар давлат солиқ бошқармаси ахборот хизмати бош мутахассиси