Куни кеча пойтахтимиздаги «Чинобод» санаториясида «Фидойинг бўлгаймиз сени, Ўзбекистон!» шоири остида мустақиллигимизнинг йигирма олти йиллиги олдидан тадбир уюштирилди.

«Оила даврасида» газетаси ижодий жамоаси иштирокида ўтган тадбирда санатория томонидан дам олувчилар ўртасида «Энг яхши китобхон», «Энг яхши ижодкор», катталар ва болалар ўртасида «Энг яхши рассом», «Моҳир қўллар» каби йўналишларда эълон қилинган танловнинг ғолиблари тақдирланди. Ғолибларга санатория ва таҳририятимиз томонидан эсдалик совғалари улашилди.
— Дам олувчилар учун ташкил этилаётган бундай беллашувлар, тадбирлар улар учун мароқли бўлиши билан бирга, янги маълумотлар олишига ҳам кўмак беради, — дейди «Чинобод» санаторияси акциядорлик жамияти бошқаруви раиси Давлат САИТОВ. — Чунки бундай кўнгилочар тадбирлар аслида мамлакатимизда бўлаётган ўзгаришларни ифода этади. Одамларни бу жараёнда фаол иштирок этишга ундайди. 
Тадбирда сўзга чиққан дам олувчилар бугунги ижтимоий ҳаётимиздаги ўзгаришларга, янгиланишларга ўз фикр-мулоҳазаларини билдиришди.