Хонадон ҳовлисига ўзгача кўрк бағишлаб, қишин-ёзин ям-яшил бўлиб турадиган чим жуда тез ўсади. Шу боис уни вақти-вақти билан калталаб, текислаб туриш керак. Албатта, бугун бу ишни техника воситаси бажармоқда.

Шунга қарамай, бироз ноқулайликлари ҳам йўқ эмас: электр токига улаб, анча вақт сарфлаб бошқариш талаб этилади. Шундай кезларда «қани эди чимни ўзи ўриб ташласа» деб юборасан, киши. Энди бундай дейишга ҳожат йўқ. Негаки, ёш ихтирочиларимиз томонидан чим ўт-газон ўрадиган робот ихтиро қилинди.

— Ушбу роботни олти кишидан иборат гуруҳимиз яратди, — дейди Турин политехника университети илмий ходими Даврон ­Ҳамидов. — Мазкур қурилма автоном ҳамда ярим автоном ҳолатда ишлайди. Қурилмага литий-ион аккумуляторлари ўрнатилган бўлиб, у икки соат давомида чимни ўриш имкониятини беради. Бундай аккумуляторлардан фойдаланиш нафақат қулай, балки экологик жиҳатдан ҳам безарар.

Шунингдек, роботга махсус Wi-Fi модули ўрнатилган бўлиб, фойдаланувчи уни масофадан туриб бошқара олади. Бунда андроид тизимидаги телефонлар учун яратилган махсус дастур қўл келади. Унинг ёрдамида инсон чим ўрувчи қурилмани ярим автоном ҳолатда бошқариши мумкин.

Робот ихтирочиларининг айтишича, «тозалаш ишлари» чим ўрувчи роботга муайян майдон ўлчами берилиши билан бошланади. «Темир одам» белгиланган жойдан чиқиб кетмаган ҳолда ўз ишини бажаради. Бу эса фойдаланувчига қулайлик яратади. Ўрилган чим қурилманинг махсус қопига йиғилади. Қоп тўлиб қолса, робот уни ўзи автоматик равишда бўшатиб, яна ўришда давом этади.

— Роботнинг қуввати тугаши мумкин, бироқ қувватлантириш қурилмаси ёрдамида бу масала ҳам осон ечим топади, — гапида давом этади ёш ихтирочи. — Бу биз ҳал қилишимиз керак бўлган масаладир. Ҳозир жамоамиз билан роботни янада такомиллаштириш устида иш олиб бормоқдамиз.

Ноилахон АҲАДОВА