Самарқанд вилоятидаги 18 мактаб тўлиқ реконструкцияга, 349 мактаб капитал таъмирга муҳтож. Қатор мактаблар ачинарли аҳволда, 35-45 йиллар давомида капитал таъмирланмаган, жорий таъмир учун ҳам маблағлар чекланган миқдорда ажратилган, дея маълумот берди Халқ таълими вазирлиги ахборот хизмати Kun.uz.га.

Ўзбекистон халқ таълими вазири Шерзод Шерматов Самарқанд вилоятига хизмат сафари чоғида ҳудуддаги мактаблар аҳволи билан танишар экан, тизимдаги муаммо ва камчиликларни аниқлади. Жумладан, 336 мактабда жисмоний тарбия дарсларини ўтиш ва ўқувчиларнинг спорт билан шуғулланишлари учун спорт заллари мавжуд эмас. 629 мактаб ҳудудининг атрофи ўралмагани натижасида ўқувчи-ёшлар хавфсизлиги етарлича таъминланмаган. 474 мактабда таълим олувчилар сони мактаб сиғимидан 50 фоизга ортиқ.

Аксар мактаблар фаолиятини тегишли даражада йўлга қўйиш учун оддий маиший шароитлар мавжуд эмас. Чекка туманлардаги мактаблар филиаллари билан боғлиқ ишлар ёмон аҳволда. Филиал мақоми сабабли улар кўпинча капитал ва жорий таъмирлаш бўйича дастурлардан тушиб қолган.