— Олий таълим муассасасида таҳсил оламан. Бир нафар фарзандим бор. Уни мактабгача таълим муассасасига жойлаштиришим учун имтиёз борми?

Г.РОЗИҚОВА,

Сирдарё вилояти

Ўзбекистон Республикаси Вазирлар Маҳкамасининг 2018 йил 28 мартдаги «Болаларни давлат мактабгача таълим муассасаларига қабул қилиш бўйича давлат хизматлари кўрсатишнинг маъмурий регламентини тасдиқлаш тўғрисида»ги 528-сонли қарори билан тасдиқланган низомга мувофиқ қуйидаги ҳолларда болалар имтиёзли рўйхатга киритилади:

 ногирон бўлган шахсларнинг болалари;

 уч нафар ёки ундан кўп болалари бўлган оилаларнинг фарзандлари;

 ҳарбий хизматчиларнинг ва ҳуқуқни муҳофаза қилиш органлари ходимларининг болалари;

 талабалар ва педагогларнинг болалари;

 етим ёки ота-онасининг қаровисиз қолган болалар;

 бошқа муассасалардан ўтказилган болалар;

 акалари ёки опалари ушбу муассасанинг тарбияланувчилари жумласидан бўлган болалар;

Мактабгача таълим муассасасига бериладиган аризаларда ушбу бандга мувофиқ имтиёз ҳуқуқининг мавжудлиги тўғрисидаги маълумот анкетада кўрсатилади. Бунда берилган йўлланмалар, тасдиқловчи ҳужжатларнинг асл нусхалари муассасага тақдим этилади ва бу болаларни муассасага қабул қилиш учун асос ҳисобланади.

Юқоридагилардан келиб чиқиб, сиз мактабгача таълим муассасасига фарзандингизни жойлаштиришда бу имтиёздан фойдаланишингиз мумкин. Бунинг учун талаба эканингизни тасдиқловчи ҳужжатни Давлат хизматлари марказига ёки Ягона интерактив давлат хизматлари порталига тақдим этишингиз лозим.