Эндиликда ягона мактаб формаси жорий этилгани ҳақида эшитдим. Бу қачондан амал қилади? Мактаб формаси мажбурийми?

Карим БОЗОРОВ,

Қамаши тумани

Вазирлар Маҳкамасининг тегишли қарори билан давлат умумий ўрта таълим муассасалари ўқувчилари учун замонавий ягона мактаб формасининг шакллари ҳамда давлат умумий ўрта таълим муассасалари ўқувчилари учун замонавий ягона мактаб формасини жорий этиш тартиби тўғрисидаги низом тасдиқланди.

Ҳужжатга кўра, 2018/2019 ўқув йилидан бошлаб ўқувчиларнинг давлат умумий ўрта таълим муассасасига тасдиқланган шакллардаги мактаб формасида келишлари ихтиёрий, 2019/2020 ўқув йилидан бошлаб эса мажбурийлиги белгиланган.

Халқ таълими вазирлиги бошқарма бошлиғи Акбар ­Тагаевнинг маълум қилишича, агар бу йилга мактаб формаси олиб қўйилган бўлса, янги форма олиш шарт эмас, ўша формани кийиб, мактабга келишга рухсат берилади.

Шунингдек, монополияга йўл қўйилмайди, яъни мактаб формасини кимдан олишнинг умуман аҳамияти йўқ, белгиланган стандартга мос келса бўлди (мактаб формани ўзлари тиктирса ҳам бўлади).

Мактаб формаси бўйича таклифлар учун бемалол мурожаат қилиш мумкин, яъни мактаб формаси шу шаклда қолиб кетмайди, уч йилгача фикр мулоҳазалар ўрганилиб, тегишли ўзгартиришлар киритилиши мумкин.