Тошкент ахборот технологиялари университетида таълимни хорижда давом эттириш имкониятини берувчи янги факультет очилгани тўғрисида эшитдим. Ушбу факультет ва унга кириш тартиби тўғрисида маълумот берсангиз.

Саидазим РАСУЛОВ,

Гулистон шаҳри

Муҳаммад ал-Хоразмий номидаги Тошкент ахборот технологиялари университети (ТАТУ) ҳамда Беларусь давлат ахборот ва радиоэлектроника университети (БДАРУ) ўртасида юқори малакали мутахассисларни тайёрлашга йўналтирилган Ахборот технологиялари қўшма факультетини ташкил этиш тўғрисидаги шартнома имзоланган.

Шартнома асосида 2019-2020 ўқув йилидан бошлаб, Тошкент ахборот технологиялари университетида ТАТУ-БДАРУ Ахборот технологиялари қўшма факультетига қуйидаги уч йўналиш бўйича талабалар ўқишга қабул қилинади:

— ахборот технологияларининг дастурий таъминоти;

— дастурланадиган мобиль тизимлар;

— сунъий тафаккур.

ТАТУ-БДАРУ Ахборот технологиялари қўшма факультетида ўқиш «2+2» схемаси асосида амалга оширилади: икки йил ТАТУда, икки йил Беларусда  таълим олинади. Факультетни муваффақиятли тамомлаган талабалар икки дипломга эга бўлиши белгиланган.

Бугунги кунда ТАТУ-БДАРУ Ахборот технологиялари қўшма факультети қошида ҳар икки олий ўқув юртининг юқори малакали ўқитувчилари томонидан 9 ойлик тайёрлов курслари ҳам ташкил қилинмоқда. Тайёрлов курслари якунида имтиҳонларни муваффақиятли топширган тингловчи БДАРУ сертификатига ҳамда муддатдан олдин талаба бўлиш имконига эга бўлади.

БДАРУ мамлакатнинг йирик миллий илмий-таълим маркази ҳисобланади. Университет замонавий лаборатория асбоб-ускуналари билан жиҳозланган ва ривожланган инфратузилмага эга.