Сиз бунга нима дейсиз, жаноб мутасадди?

1 июнь — Халқаро болаларни ҳимоя қилиш куни юртимизда кенг нишонланди. Буни телевидение орқали мириқиб томоша қилдик. Айниқса, жажжи болажонларнинг ота-оналари, буви ва боболари билан биргаликда шаҳарларнинг чиройли истироҳат боғларида, аттракционларда маза қилиб учишларини кўриб, юртимизда фарзандларимизга яратилаётган бундай шарт-шароитлардан бошимиз осмонга етди. 

Аммо... 
Нега энди бу каби шароитлардан қишлоқ болалари баҳраманд бўлмас экан, деб ўйланиб қоласан киши. Баъзи бир туман марказларидаги истироҳат боғларининг аҳволини кўриб ачиниб кетасан.
...Неваралари Шомурод акани эрталабдан ҳоли-жонига қўйишмади.
— Бобо, бизни қачон паркка олиб борасиз. Ана, Шодликни бобоси аллақачон кетиб бўлди. Сиз бўлса, ҳалиям юрибсиз. Олиб бора қолинг, бобо, жон бобожон!..
Невараларининг ялиниб туришларини кўрган бувиси Шодмоной ая гапга аралашди:
— Бобоси, невараларингизнинг сазасини ўлдирманг, олиб бора қолинг, маза қилиб ўйнаб келишсин. Дарров машинангизни ўт олдиринг. Бола пошшо бўлади-я, — деди.
Шомурод муаллим кичкинтойларга ваъда бериб қўйганидан ўзини койиди. Нима, шу туман марказидаги истироҳат боғига олиб бораманми? У ерда нима бор? Ҳеч бир аттракциони, арғимчоқлари ишламаса. Унинг нимасини айланишади? Боргани билан ҳафсаласи пир бўлгани қолади буларнинг, деб хаёлидан ўтказди. Аммо болалар буни қайдан билишсин. Уларга буни қани энди тушунтириб бўлса. «Ҳа, майли, нима бўлса бўлар, мутассаддилар байрам баҳона балки ишлатган бўлишса ажаб эмас», деб машинасига невараларини миндириб, йўлга тушди.
Қишлоқчилик-да, кимда улов бор, кимда йўқ. Кимда имкон бор, кимда йўқ. Имкони борлар вилоят марказига, Шомурод муаллимга ўхшаганлар туман марказига, жуда имкон тополмаганлар эса қишлоқ ёки маҳалла марказидаги дўконларга чиқиб фарзандларига биттадан музқаймоқ олиб бериб, байрамни нишонлашади-қўяди. Шу билан байрам тамом.
Шомурод бирпасда туман марказидаги истироҳат боғига етиб борди. Машинасини чеккага қўйиб невараларининг қўлидан тутиб хиёбонга кирди. Тумонат одам. Гўё ҳамма шу ерга кўчиб келгандай. Айниқса, истироҳат боғида музқаймоқ, салқин ичимликлар савдоси қизиган. Савдогарларнинг бу мусабақасида кабобпазлар улоқни эгаллашган чоғи. Кичкинагина боғда йигирмадан зиёдроқ жойда кабоб савдоси. Йўлаклар торлигидан зўрға юрасан. Кабоб қўраларининг тутунини-ку айтмасаям бўлади. Истироҳат боғининг амфитеатрида болажонлар учун куй ва қўшиқлар авжида. Шомурод муаллим неваралари билан бирпас ашула ва рақс томоша қилишган бўлди. Кенжа невара арғимчоқда учайлик, деб хархашани бошлади. Шундоқ юриб чархпалак ва арғимчоқлар турган жойга яқинлашишди. Афсус, минг афсус, хиёбондаги бу нарсалар ишламасдан турганини кўриб, Шомурод муаллим ерга қаради. Неваралари:
— Эҳ, ишламас экан, — дейишди.
Бир томонда фақат шиширилган батут ишлаётган экан, неваралар ўша ёққа чопишди. У ердаги болаларнинг навбати катталигидан капалаги учиб кетди. Ҳамма ҳам фарзандларини қувонтиргиси келади-да. Нима қилишсин. У ердан ҳам ҳафсаласи пир бўлган болажонлар ахийри кичик бир учиш мосламасини қўли билан ҳаракатга келтираётган иккита йигитнинг олдига бориб, минг сўм беришиб икки дақиқа учишди. Шунинг билан невараларнинг истироҳат боғидаги сайру томошаси якунига етди.
Бу манзара Қўшкўпир туман марказидаги Замахшарий номидаги маданият ва истироҳат боғида 1 июнь — Халқаро болаларни ҳимоя қилиш кунидан бир парча. Бунга ўзим шахсан гувоҳ бўлдим, суратга ҳам олдим. Ахир, туман мутасаддилари боғда болалар байрами бўлиб ўтишини яхши билишади-ку! Нега мавжуд аттракцион ва арғимчоқларни таъмирлаб, болажонларга шароит яратишмади? Ёки боғнинг эгаси йўқми? Шунча гектарлаган майдон ким учун, нима учун хизмат қилиши керак? Мана сизга масъулиятсизлик, мана сизга хўжасизлик...
Истироҳат боғи ўз номи билан ҳамма сайр этадиган жой. Унда ёш ҳам, қария ҳам, болалар ҳам бирдай дам олмоққа, ҳордиқ чиқармоққа ҳақли. Боғдаги бу анжомларнинг элга хайри тегмаса, бундан на фойда. Мутасадди ташкилотлар ушбу воқеликка аниқлик киритишни сўраб қоламиз.
Болтабой 
МУҲАММАД ҚУРБОН,
Хоразм вилояти