Карантиндан чиқаётган олам

Дунё аста-секинлик билан карантиндан чиқмоқда. Мисол учун, Мадрид ва Барселонада яқинлар билан учрашувларга рухсат берилди, айвонли кафе, барлар очилмоқда. Атлантика океани қумли соҳилларида, шунингдек Андалусия минтақасида жойлашган испан пляжлари ишлай бошлади.

Ҳозиргача айни манзиллар фақат спорт билан шуғулланиш учунгина очиқ эди. Пляжларда дам олишга рухсат берилган бўлса-да, соғлиқни сақлаш тизими маҳаллий хизматчилари кирувчилар сонини чегаралаш, қолаверса, ҳимоя экранлари ўрнатиш ва соябонларни тўрт метрлик оралиқ масофани сақлаган ҳолда жойлаштиришни тавсия этмоқда.
Чехия кўчаларида тиббий ниқоб тақиб юриш мажбурийлиги бекор қилиняпти, меҳмонхоналар, фитнес марказлари, сауналар, ресторан, кафелар очиляпти, иштирокчилар сони 300 нафаргача бўлган оммавий тадбирлар тикланяпти.
Грецияда 25 майдан бош­лаб умумий овқатланиш корхоналари ишлай бошлади, оролларга чиқишга рухсат берилди. Мамлакатга сайёҳларни қайтариш чоралари кўрилмоқда — эпидемик вазият яхши бўлган давлатлардан келадиган хорижликлар учун коронавирусга тест натижаси талаб этилмайди.
Қирғизистонда жамоат транспорти ҳаракати тикланди, Бишкекда музейлар, кафе ва бассейнлар ишлай бошлади.
Ҳаммадан олдин карантиндан босқичма-босқич чиқа бош­лаган Германияда, афсуски, кейинги кунларда зарарланиш ўчоқлари қайд этилиши давом этди. Иккита йирик ўчоқ гўшт комбинатларида топилди. 
Туркияда эпидемиологик вазият Европадагига нисбатан қулайроқ. Тиббиёт ходимларининг эътирофича, ҳукумат фуқароларни оммавий равишда тестдан ўтказишни бошлаб, вирус аниқланган кишиларни зудлик билан яккалаб, тўғри қарорлар қабул қилган.
Душанба куни Франция ҳукумати изоляция тартибларини юмшатишнинг янги босқичи бўйича йўл харитасини тақдим этди. Мазкур ҳужжат бар ва ресторанлар, шунингдек меҳмонхоналар ва кемпинглар очилиши эҳтимолини назарда тутувчи йўриқномадан иборат бўлади. Қолаверса, французларга таътилни қандай ўтказиш мумкинлиги тўғрисида ҳам тушунтириш берилади.

Янги тўлқин хавфи

Аммо Жаҳон соғлиқни сақлаш ташкилоти коронавирус пандемиясининг иккинчи тўлқини ҳақида огоҳлантирмоқда. Коронавирус эпидемиясининг пасайиши кузатилган давлатлар, агар улар назоратни заифлаштирса, эпидемиянинг иккинчи тўлқинига дуч келиш­лари мумкин.
Бу ҳақда Жаҳон соғлиқни сақлаш ташкилотининг фавқулодда вазиятлар дас­турининг раҳбари Майкл Райан онлайн-брифингда маълум қилган. Унинг сўзларига кўра, дунё эндигина коронавирус пандемиясининг биринчи тўлқинининг ўртасига етиб келди. Сабаби касаллик Марказий ва Жанубий Америкада, Жанубий Осиё ва Африкада авжга чиққан. Касалликнинг тарқалиши тўлқинга ўхшашдир: ўсгандан кейин пасайиш кузатилади ва кейин инфекция яна бошланади.
Мутахассислар «иккинчи тўлқин» тушунчасини қуйидагича изоҳлайдилар: биринчи тўлқинда беморларнинг сони минимал даражага туширилади ва бир неча ойдан кейин касаллик яна авжга чиқиши мумкин.
«Бир неча ойдан кейин бу кўплаб мамлакатларда акс этади. Шу билан бирга, пандемиянинг иккинчи босқичи мавсумий грипп пайтига тўғри келиши мумкин. Шу муносабат билан, дунё мамлакатлари коронавирус учун тестларни тўхтатмасдан, соғлиқни сақлаш соҳасида кенг қамровли чораларни кўришни ва унинг тарқалиш йўлларини ўрганишда давом эттиришлари керак», – деди Райан.

Глобал инқироз

Жаҳон банки COVID-19 пандемияси 60 миллион кишини ўта қашшоқ аҳволга тушириб қўйиши мумкинлигидан огоҳлантирмоқда.
Халқаро энергетика агентлиги ҳисоботига кўра, 2020 йилда энергетика соҳасига глобал инвестиция киритиш 400 миллиард АҚШ долларига қисқаради ва бу тарихдаги энг йирик пасайиш бўлади. Нефт-газ соҳасида ҳам инвестициялар 32 фоизгача камаяди. Истеъмолчиларнинг нефт харажатлари 2020 йилда қарийб 1 триллион долларга пасаяди. Электр энергияси соҳасидаги даромадлар 180 миллиард долларга камаяди. Буларнинг барчаси – тўловларни амалга оширмаслик кўпайгани билан боғлиқ.