Шу туфайли одамлар вафот этаётган бўлса  ––  бу чинакам фожиа!

Кеча бир яқин дўстимизникига таъзияга бориб келдик. Отаси коронавирус балосига чалиниб 62 ёшида вафот этибди. Отани йўқотиш жуда оғир дард, елкалари чўкиб қолган. Келди-кетди якунлаб қолганда дўстимга далда беришга ҳаракат қилдим. Ўзи шифокор бўлгани учун отахонда касаллик нега бунчалик оғир кечгани ҳақида сўрадим.

Дўстим оғир хўрсиниб охири «ёрилди»: «Отамда коронавирус аломатлари бошланганини билгани ҳамон ўзим қарайман, деб Қашқадарёдан Тошкентга олиб келдим. Аммо аҳволлари оғирлашавергач Зангиота туманидаги янги қурилган махсус шифохонага жойлаштирдим. Кислород аппаратига ҳам улашди.

Танишларим орқали сўраб тураман, ўзим кириб кўраман, аҳволлари анча яхши томонга ўзгараётган эди. Сатурация кўрсаткичи ҳам кўтарилиб, умумий аҳволи қониқарли эди. Аммо... ўша куни шифохонада

1-2 соат чироқ ўчиб қолди. Биласиз, ҳамма аппаратуралар электр токи билан ишлайди. Етарли кислород бормай қолгани туфайли отамнинг жони узилди... Эшитишимча ўша пайтда яна бошқа бир неча ўлим ҳолати юз берган...» Ана холос! XXI асрда-я! Ишонгинг келмайди. Эсингизда бўлса, 29 май куни Тошкент вилояти Зангиота туманида барпо этилган ушбу кўп тармоқли махсус шифохона Президентга роса мақтаб кўрс атилган эди. Тўғриси, буни қандай изоҳлашни ҳам билмай қолдик. Шифохонада жой етишмаганидан ёки зарур аппаратлар топилмаганидан эмас, ўша шароитларнинг ҳаммаси бўлатуриб, уни ишлатиш учун электр токи йўқлиги туфайли одамлар вафот этаётган бўлса – бу чинакам фожиа.

Яқинда ижтимоий тармоқларда Тошкентнинг Яккасарой туманидаги коронавирус билан касалланганлар дав оланаётган шифохонада ҳам икки соат электр токи узилиб қолгани ҳақида ёзишди. Демак, бу муаммо бир ёки икки ҳолатда эмас, анчайин кенг қамровлига ўхшаяпти.

Ўзим туғилиб ўсган туманда ҳатто туғруқхонага боришда «движок» учун беш литр бензин кўтариб бориш одатга айланган эди бир вақтлар. Қанча чақалоқлар шам ёруғида туғилди, қоронғида киндиги нотўғри кесилгани туфайли гўдаклар нобуд бўлган ҳолатлар ҳам кузатилди...

Ўша вақтлар ортда қолди, деб эрта хурсанд бўлмадикмикан ишқилиб... ...Таъзия билдириб кўчага чиқар эканмиз, дарвозасининг шундоқ яқинида ўрнатилган мобиль телефон антеннасига кўзимиз тушди. «Яхши, алоқадан қийналмас экансиз», дедик бироз чалғитишга уриниб. «Ҳа, бунга ҳам отам қараб турардилар. Мана антенна пастига электр двигатель ўрнатилган.

Бизни уйга ҳам электр бериб туради», деди. Яна қўшимча қилди: «Масофадан туриб компьютер орқали бошқаришади. Электр ўчса 50 секунд ёки 1 минутга бормасдан «движок» автоматик қўшилади...» Бошқа ҳеч нарса дея олмадик. Балки замонавий шифохона қурганлар бирор нима айтишар...

Ogoh.uz