Олий Мажлис Қонунчилик палатасидаги Ўзбекистон Экологик партияси фракцияси йиғилишида дастлаб «Давлат божи тўғрисида»ги Ўзбекистон Республикаси Қонунига ўзгартиш ва қўшимчалар киритиш ҳақида»ги қонун лойиҳаси кўриб чиқилди.

Мазкур ҳужжат Президентимизнинг 2019 йил 9 сентябрдаги тегишли фармони билан тасдиқланган «Йўл харитаси»нинг 8-бандига мувофиқ нотариал ҳаракатларни амалга оширишда ундириладиган тўловлар миқдорини фуқаролар учун тушунарли ва шаффофлигини таъминлаш мақсадида оптималлаштириш учун ишлаб чиқилган.

Қонун лойиҳасида нотариал ҳаракатларни амалга оширганлик учун белгиланган бир қатор давлат божи миқдорларининг ставкаларини оптималлаштириш назарда тутилмоқда.

Йиғилишда фракция аъзолари қонун лойиҳасини партия нуқтаи назаридан келиб чиқиб, муҳокама қилди ва уни янада такомиллаштириш бўйича қатор таклифлар берди. Ўз навбатида, ҳужжатнинг қабул қилиниши билан давлат божи ставкалари оптималлаштирилишини инобатга олиб, уни маъқулладилар.

Йиғилишда «Солиқ маслаҳати тўғрисида»ги қонун лойи­ҳаси ҳам муҳокамалар марказида бўлди.

Лойиҳа билан солиқ маслаҳатчилари институти шакллантириш, солиқ тўловчиларининг ҳуқуқларини ҳимоя қилиш, солиқ мажбуриятларини бажаришда малакали ёрдам кўрсатиш, солиқ маслаҳатчилари ҳуқуқий мавқеини мустаҳкамлаш ва улар томонидан кўрсатиладиган хизматлар сифатини ошириш кўзда тутилмоқда.

Солиқ маслаҳатчилари палатасининг вазифалари, Солиқ маслаҳатчилари ташкилотларининг ҳуқуқ ва мажбуриятлари, солиқ маслаҳати хизматларини кўрсатиш тартиблари белгиланмоқда.

Йиғилишда халқ вакиллари томонидан қонун лойи­ҳаси юзасидан берилган қатор саволларга мутасаддилардан батафсил жавоблар олинди ва ушбу ҳужжат қўллаб-қувватланди.