Ер шарининг 70 фоиздан кўпроғи сув билан қопланган бўлса-да, чучук сувнинг миқдори бор-йўғи 3,5 фоизни ташкил этади. Демак, бундан кўриниб турибдики, ичимлик сув табиатнинг туганмас ресурси эмас. Сизга кимдир Ўзбекистонда 10 йилдан кейин сув танқислиги кузатилади, деса ишонасизми? Ишонаверинг. Сиз Тошкентда яша­сангиз ҳам айни шу муаммо сизни кутиб турибди. Агар сиз ва мен сувни тежаб ишлашни ўрганмасак, 10 йилдан кейин Ўзбекистон жиддий сув танқислигига дуч келади.

Ер шарининг 70 фоиздан кўпроғи сув билан қопланган бўлса-да, чучук сувнинг миқдори бор-йўғи 3,5 фоизни ташкил этади. Демак, бундан кўриниб турибдики, ичимлик сув табиатнинг туганмас ресурси эмас. Сизга кимдир Ўзбекистонда 10 йилдан кейин сув танқислиги кузатилади, деса ишонасизми? Ишонаверинг. Сиз Тошкентда яша­сангиз ҳам айни шу муаммо сизни кутиб турибди. Агар сиз ва мен сувни тежаб ишлашни ўрганмасак, 10 йилдан кейин Ўзбекистон жиддий сув танқислигига дуч келади.

Шунинг учун ҳам сувни тежаш услубларини аҳолига, ёшларга чуқурроқ тушунтириш мақсадида Ўзбекистон Экологик партияси Марказий Кенгаши Ижроия қўмитаси ҳамда «Ўзсувтаъминот» акциядорлик жамияти ҳамкорлигида октябрь ойининг биринчи ҳафтасида республикамизнинг барча ҳудудлари бўйлаб «Сувни биргаликда асрайлик!» шиори остида «Биз сувни тежаш ва исроф қилмасликка тайёрмиз» мавзусида тарғибот ҳафталиги ўтказилмоқда.

Жумладан, Мирзо Улуғбек номидаги Ўзбекистон Миллий университетида тарғибот ҳафталиги доирасида тадбир ташкил этилди. Унда Ўзбекистон Экологик партияси Марказий Кенгаши Ижроия қўмитаси ҳамда «Ўзсувтаъминот» АЖ вакиллари, университет талабалари иштирок этди.

– Бугунги кунда юртимиз аҳолиси ва ёшларининг экологик маданиятини ошириш, атроф муҳитга эҳтиёткорона муносабатда бўлиш, айниқса, кундан-кунга глобаллашиб бораётган сув тақчиллигининг олдини олиш бўйича тегишли чораларни белгилаш муҳим масалалардан бири ҳисобланади, – деди тадбирда сўзга чиққан Ўзбекистон Экологик партияси Марказий Кенгаши Ижроия қўмитаси бўлим бошлиғи Моҳинурхон Эргаш. – Иқлим ўзгариши натижасида сув муаммоси янада кес­кинлашмоқда. Ер шарида 3 фоиз чучук сув мавжуд. Ушбу чучук сувнинг ҳам атиги 1 фоизи истеъмолга яроқли ҳисоб­ланади. Дунёдаги шўрланиш ва иқлим исиши ўз навбатида бу кўрсаткичларга салбий таъсир кўрсатмасдан қўймайди. Сўнгги 10 йилликда қор ёғиши жуда кам кузатилди. Нега айнан қор? Чунки сув захираларининг шаклланишида қорнинг аҳамияти катта. Ёмғир ёғса, ер бу сувни шимиб олиши мумкин. Лекин қор тоғда музликларни ҳосил қилади. Бундан ташқари, Марказий Осиё мамлакатларида аҳоли сони ошгани сайин сувга бўлган талаб ҳам ниҳоятда ортиб бормоқда.

Айни шу мақсадда тарғибот ҳафталиги республикамизнинг барча туман ва шаҳарларида, жумладан, маҳалла фуқаролар йиғинларида, давлат мактабгача ва мактаб таълими ташкилотларида ҳамда олий таълим муассасаларида ўтказилмоқда.

Тан олишимиз керак, бугун хонадонларда сувдан фойдаланишда тежамкорликка деярли эътибор қаратилмайди, айниқса, дала ҳовлилардаги боғларда сув исрофгарчилиги жуда юқори.

Ушбу хонадонлардаги очиқ сув ҳавзалари (ҳовуз, бассейнлар) ичимлик сув билан тўлдирилади, кўп ҳолларда бу сув тез-тез янгиланади, автоуловларни ювишда ҳам ушбу танқис ресурс ишлатилади.

Боғлар соатлаб жўмракдан оқаётган ичимлик сув билан суғорилади, фавворалар ва «микроклимат» деб аталмиш сув пуркаш тизими қимматбаҳо манба, яъни, ичимлик сувни катта миқдорда сарфлайди.

Сув ресурсларининг камайиши ва танқислиги бутун дунёда кузатилаётган глобал муаммодир. Бундан тегишли хулоса чиқариб, сувни тежаш ва мақсадли ишлатишни ўрганишимиз зарур. Лекин бу йўналишда ўз ечимини кутаётган асосий масала – сувдан фойдаланишдаги исрофгарчилик ва ўйловсиз ишлатишдир. Кундалик ҳаётимизда сувни беҳуда, мақсадсиз исроф қилиш ҳолатларига чек қўймас эканмиз, бу борада бирор натижага эришишимиз амри маҳол.

Тадбирда шу ва сувни исроф қилинишининг олдини олиш билан боғлиқ масалалар ҳақида талаба-ёшларга тушунтиришлар бериб ўтилди.

ЎЭП Марказий кенгаши

Матбуот хизмати