1972 йилда 23 давлат номидан икки мингдан зиёд давлат ва нодавлат ташкилотлар вакиллари, экология ва атроф-муҳитни муҳофаза қилувчи экологлар, илмиий ходимлар ҳамда табиатни асраб-авайлаш йўлида фидокорона хизмат қилиб келаётган фаоллар БМТга ўз мурожаатларини йўллашди. Унда қисқа ва лўнда қилиб, «Атроф-муҳитга бўлган муносабатимизни ўзгартирамиз ёки атроф-муҳит, табиат бизни маҳв этади», деб ёзилган эди.

Наврўзбек ЮСУПОВ,

Олий Мажлис Қонунчилик палатаси депутати,

ЎЭП фракцияси аъзоси

1972 йилда Швеция пойтахти Стокгольм шаҳрида атроф-муҳитни асраш масалларига оид катта конференция ташкил этилди. Конференция кун тартибида фақат битта – атроф-муҳит муҳофазаси масаласи кўриб чиқилиб, БМТ резолюцияси қабул қилинди. Резалюцияга асосан 5 июнь – Бутунжаҳон атроф-муҳит муҳофазаси куни деб эълон қилинган. Ушбу сана доирасида турли экологик акциялар, экологик инновацион лойиҳалар, атроф-муҳитни асраб-авайлашга қаратилган йирик лойиҳаларни ҳаётга тадбиқ қилиш асосий мақсад қилиб олинди.

Мамлакатимизда ҳам ушбу кун муносабати билан ҳар йили турли экологик муаммоларни бартараф этиш, келгуси авлодга табиатни софлигича қолдириш борасида янги-янги шиорлар остида турли хил экологик тадбирлар ташкил этиб келинмоқда. Шуни таъкид­лаб ўтиш жоизки, Ўзбекистон Экологик партияси ташкилотлари ҳамда Олий Мажлис Қонунчилик палатасидаги фракцияси биргаликда ҳар йили респуб­лика миқёсида илмий-амалий конференциялар ташкил этиб келади. Ушбу конференция доирасида экологик стартап лойиҳалари, турли номинацияларни ўз ичига олган «Энг яхши эковидеоролик» танловлари ҳам эълон қилинади. Бу лойиҳалар ўтказилишидан асосий мақсад ҳам соҳага янги инновацияларни жорий этиш ва ушбу инновациялар орқали атроф-муҳитни муҳофаза қилиш, табиий ресурслардан тўғри ва оқилона, самарали фойдаланиш орқали келгуси авлодларга ҳам етарлича қолдиришдир.