Мамлакатимизда 2024 йил 27 октябрь куни бўлиб ўтадиган сайловларда рақамли технологиялар имкониятларидан самарали фойдаланиш йўлга қўйилгани сиёсий партиялар ишини ҳам сезиларли даражада енгиллаш­тирмоқда.

Сайлов жараёни иштирокчилари ўртасидаги муносабатларни тўлиқ рақамлаштириш, сайлов тартиботларидаги бюрократия, ортиқча вақт сарфи ва ҳужжатлар ҳаракатини қисқартириш, манфаатлар тўқнашувининг олдини олиш, сайловларга оид маълумотларнинг янада очиқлигини таъминлаш мақсадида ишлаб чиқилган «E-Saylov» ахборот тизими орқали сайлов жараёнларига оид деярли 60 турдаги муносабатлар тўлиқ рақамлаштирилди.
Бу билан сайловчилар, кузатувчилар ва бошқа вакилларнинг сайловда иштироки электрон шакл кўмагида ташкил этилмоқда.
Сайловчиларнинг «E-Saylov» ахборот тизими орқали ўз ҳудудидан кўрсатилаётган номзодлар ва уларнинг дастурлари тўғрисида етарли маълумотлар олишига имконият яратилмоқда.
Ҳозирга қадар партиямиз томонидан ҳудудларда мазкур тизим орқали 5695 нафар номзод «E-Saylov» ахборот тизимига киритилди. Ҳозирда партиямизнинг V форумида делегатлар томонидан тасдиқланган бир мандатли сайлов округлари бўйича 75 нафар хамда партия рўйхати бўйича Қонунчилик палатаси депутатлигига кўрсатилган 100 нафар номзодларни рўйхатга олиш жараёнлари давом этмоқда.
«E-Saylov» тизимидан Марказий сайлов комиссияси, ҳудудий сайлов комиссиялари, сиёсий партиялар, Қорақалпоғис­тон Республикаси Жўқорғи Кенгеси, халқ депутатлари Кенгашлари, Тошкент шаҳар, вилоятлар ҳамда туман-шаҳарлар ҳокимликлари фойдаланиш имкониятига эга.
Номзодлар ва уларнинг ишончли вакиллари эса шахсий кабинетига SMS код орқали киришлари мумкин. Қолган барча фойдаланувчилар электрон рақамли имзо калитлари орқали ушбу тизимдан фойдаланишлари мумкин бўлади.
Маълумот ўрнида айтиб ўтишимиз жоиз, «E-Saylov» ахборот тизими орқали яратилган имкониятлардан яна бири бу – ОАВ вакилларини аккредитациядан ўтказиш ҳисобланади. Ушбу технологик имконият туфайли сайловларда ОАВ вакилларини аккредитациядан ўтказиш илк бор электрон шакл­да амалга оширилади.
Электрон шаклда аккредитация қилиш тартибининг жорий этилиши сайловларнинг янада очиқлигини ва унда ОАВ иштирокини қўллаб-қувватлаш мақсадида сезиларли даражада соддалаштирилган. Хусусан, аккредитация учун ариза беришда қуйидаги уч турдаги ҳужжатларни тақдим этиш талаб этилмайди:
• ходимнинг шахсини тасдиқловчи ҳужжат нусхаси;
• ОАВнинг давлат рўйхатидан ўтганлиги тўғрисидаги гувоҳномаси нусхаси;
• ходимнинг электрон фотосурати.
Ушбу имкониятлар мамлакатимизда сайлов жараёнларини очиқлик ва ошкоралик тамойил­лари асосида, халқимизнинг, барча сайловчиларнинг фаол иштирокида ўтишига замин ҳозирлайди.

Комилжон Жўраев,
ЎЭП Марказий Кенгаши бўлим бошлиғи