Ўзбекистон Президенти Шавкат Мирзиёев Парламентлараро Иттифоқнинг 150-Ассамблеясида таъкидлаганидек, ҳудудларимизда 30 дан ортиқ ваколатлар маҳаллий Кенгашларга ўтказилди ва бу жараён изчил давом этмоқда. Бу эса, муаммоларни жойида ҳал этиш имконини яратмоқда.

Натижада, аҳоли турмуш тарзи, ҳудудлар ижтимоий-иқтисодий ҳаётида халқ депутатларининг таъсири ошиб, ижобий имижи шаклланмоқда.

Мамлакатимизда маҳаллий даражадаги бошқарув тизимини демократизация қилишда Конституциявий ислоҳотлар ўз аксини топмоқда. Ўтган йилги сайловлардан кейин вилоятлар ва Тошкент шаҳар Кенгашларига ҳокимлар эмас, депутатлар ичида танланган шахс раислик қилмоқда. Ушбу тажриба  туман ва шаҳарларда ҳам 2026 йил 1 январдан бошланиши белгиланган.

Жаҳон тажрибасида ҳам маҳаллий кенгашлар фаолиятини кучайтириш орқали ҳокимиятнинг очиқлиги ва ҳисобдорлиги таъминланган. Масалан, Германия, Жанубий Корея ва Японияда маҳаллий ваколат органларига кенг автономия берилиб, муаммоларни маҳаллий даражада тезкор ҳал этиш имконияти яратилган.

Умуман олганда, маҳаллий Кенгашлар ваколатларининг кенгайиши уларда янги сиёсий саҳифа очиб, халқ ва давлат ўртасидаги масофанинг яқинлашганини англатади.

Севара ФАЙЗИЕВА,

ЎЭП Тошкент шаҳар кенгаши раиси, халқ депутатлари шаҳар Кенгаши депутати