Яқинда умуммиллий байрам – Ўқитувчи ва мураббийлар куни арафасида Ўзбекистон Экологик партия­сидан халқ депутатлари вилоят Кенгаши депутати Зайниддин Салямов «Таълим ҳомийси» кўкрак нишони билан тақдирланди. Қандай хизматлари учун дейсизми? Бир сўз билан айтганда, кўплаб ўқитувчию ўқувчилар меҳрини қозониш, келажак авлод учун мудом қайғуриш орқали сазовор бўлди бу эътирофга.

Мамлакатимиз ўз тараққиётининг янги даврига қадам қўйган ҳозирги кунда замонавий давлатлар қаторидан муносиб ўрин эгаллаши аввало илм-фан ва таълим-тарбия соҳасининг ривожи, бу борада бизнинг дунё миқёсида рақобатдош бўла олишимиз билан узвий боғлиқ, десак муболаға бўлмайди. Юртимизда ўқитувчи ва мураббийларнинг жамиятдаги ўрни ва аҳамиятини таъкидлаш, уларнинг фидокорона меҳнати учун миннатдорлик билдириш мақсадида ушбу сана нишонланади.

Қашқадарё вилоятида ҳам байрам ўзгача нишонланди. Байрам арафасида таълим муассасаларида турли маънавий-маърифий тадбирлар, учрашувлар ўтказилди. Жумладан, халқ депутатлари вилоят Кенгашига Ўзбекистон Экологик партиясидан сайланган депутат Зайниддин Салямов  томонидан Қарши шаҳридаги 3-мактаб таъмирланиб, касб-ҳунар тўгараклари маркази ёшлар учун хизмат қилмоқда.

– 1924 йилда қурилган ушбу мактабда ўзим ўқиганман, – дейди З.Салямов. – Мактаб маъмурияти, ўқитувчилар ва ота-оналар билан суҳбатлашар эканман, ушбу таълим даргоҳи таъмирталаб аҳволга келиб қолгани, ўқувчилар совуқ кунларда анча қийналишаётгани маълум бўлди. Таълим даргоҳидаги мавжуд муаммоларни ҳал этишни ўз олдимга мақсад қилдим.

Таъкидлаш жоизки, ушбу мактаб депутат ва тадбиркор Зайниддин Салямов бошчилигидаги «1-комплекс лойиҳа-қурилиш ва монтаж» ХКнинг 3,5 млрд сўм ҳомийлик маблағлари томонидан таъмирланиб, янгича қиёфа акс этишидан ташқари ўқувчилар ва маҳалла ёшлари учун «Касб-ҳунарга ўқитиш маркази» қуриб берилди.

Байрам куни «Оқ рух» шахмат клуби устозлар иштирокида тантанали равишда очилди. Шу билан бирга, мактабда сунъий қоп­ламали мини-футбол майдони қуриб берилди, таъмирланган ёпиқ спорт зали эса ёшларнинг спортга бўлган қизиқишларини янада оширишга хизмат қилади.

Қашқадарё вилоят ҳокими Муротжон Азимов томонидан «Таълим ҳомийси» кўкрак нишони Зайниддин Салямовга тантанали равишда топширилди.

Халқ ва ҳокимият ўртасида кўприк вазифасини бажараётган, аҳолини қийнаётган муаммоларни бартараф этишда ўз ҳиссаларини қўшаётган депутатлар бажараётган ишларидан фахр туяди ва савобли амалларни давом эттираверадилар.

Сожида АЛЛАЯРОВА,

ЎЭП Қашқадарё вилоят кенгаши бош мутахассиси