Депутат ёрдамчиси лавозими депутатнинг самарали фаолиятини таъминлашда муҳим аҳамиятга эга бўлиб, унинг вазифалари фақатгина техник ишларни бажариш билан чекланмайди. Олий Мажлис Қонунчилик палатасидаги Ўзбекистон Экологик партияси фракцияси раҳбари Абдушукур Ҳамзаев таъкидлаганидек, ёрдамчининг асосий миссияси халқ ва депутат ўртасидаги ишончли кўприк бўлишдан иборат.

Депутат ёрдамчиси – бу депутатнинг ҳудуддаги «кўзи ва қулоғи» бўлиб, унинг масъулиятисизлиги ортидан халқ манфаатлари ҳимояси сустлашиши муқаррар.

Куни кеча Олий Мажлис Қонунчилик палатасидаги Ўзбекистон Экологик партияси фракциясининг навбатдаги йиғилишида айнан депутат ёрдамчиларининг фаолияти танқид остига олинди.

Жорий йилнинг 26-29 ноябрь кунлари депутатларнинг ҳудудлардаги ўрганишлари ва сайловчилар билан ўтказган учрашувлари натижалари атрофлича кўриб чиқилиши жараёнида, ушбу ишларнинг ташкил этилишидаги асосий камчиликлар ва бу камчиликларнинг аҳоли муаммоларини ҳал этишга салбий таъсири ошкора кўрсатиб ўтилди.

Фракция раҳбари Абдушукур Ҳамзаев айрим ҳудудларда депутатлар ва сайловчилар учрашувлари етарли даражада ташкил этилмаётганига алоҳида урғу берди. Энг асосий муаммо шундаки, депутат ёрдамчилари ўрганишлар ҳақидаги маълумотларни аҳолига олдиндан етказмаслиги сабабли кўплаб долзарб масалалар ечимсиз, яъни очиқ қолиб кетмоқда. Бундай масъулиятсизлик парламент ва халқ ўртасидаги алоқани сусайтириб, депутатнинг ҳудуддаги фаолият самарадорлигига бевосита салбий таъсир кўрсатади. Бу ҳолат, амалда, депутатнинг ўз сайловчиларининг ҳақиқий муаммоларидан хабардор бўлишига тўсиқ яратади.

Шу муносабат билан, фракция раҳбари ҳар бир депутат ёрдамчисига бу борада аниқ ва қатъий вазифалар юклади. Унинг сўзларига кўра: «Депутат ҳудудга борганда, энг аввало уларни сайлаган халқни нима муаммолар қийнаётгани, ҳал этилмаётган қандай масалалар борлигини ўрганиши керак. Бу ишларни сифатли ташкил этиш эса депутат ёрдамчиларининг биринчи галдаги вазифасидир». Депутат ёрдамчиси лавозими шунчаки техник ходим эмас, балки депутатнинг халқ билан «кўприги» ва муаммоларни тизимли таҳлил қилувчи шахс эканлигини англатади. Улар фаолиятининг сустлиги, аслида, халқ манфаатларининг ҳимояси сустлашишига олиб келади.

Танқидий руҳда ўтган йиғилишда ўз вазифасига совуққонлик билан ёндашаётган, берилаётган огоҳлантиришларга қарамай фаолиятида ижобий ўзгариш кўрсатмаётган айрим депутат ёрдамчилари ҳақида ҳам кескин фикрлар билдирилди. Бу ҳолат, аввало, хизмат бурчига нисбатан енгил-елпи муносабатда бўлган шахсларга нисбатан тегишли чораларни кўриш зарурлигини кўрсатади.

Ўзбекистон Экологик партияси фракциясининг ушбу танқидий йиғилиши депутат ёрдамчилари фаолиятини тубдан қайта кўриб чиқишга туртки бериши лозим. Депутатнинг самарадорлиги тўғридан-тўғри унинг ёрдамчисининг ташкилотчилиги ва масъулиятига боғлиқ экан, ушбу лавозим эгаларидан сайловчилар билан алоқани мустаҳкамлаш, уларнинг муаммоларини жойида ўрганиш ва депутатга сифатли таҳлилий маълумот бериш талаб қилинади. Акс ҳолда, депутатларнинг ҳудудларга сафари шунчаки расмиятчилик бўлиб қолиши мумкин.

Саида ИБОДИНОВА