Сайлов куни яқинлашмоқда. Ўзбекистон Экологик партияси «Табиат учун бирлашайлик!» шиори билан, табиатни асраш, экологик ҳуқуқларни таъминлаш, ҳуқуқбузарларга қатъий чоралар кўриш, яшил иқтисодиётни қўллаб-қувватлаш каби ташаббуслари билан минглаб сайловчилар ишончига кириб бормоқда. Экопартия ташаббус­ларига хайрихоҳлар сафи тобора кенгаймоқда.

Партия илгари сураётган янги ташаббус ва таклифларини аҳоли орасида кенг таништириш, фуқароларнинг овозини қадр­лаш ва уларнинг сайловда фаол иштирокини таъминлашга алоҳида эътибор бериб, оммавий тарғибот тадбирларини ташкил этмоқда. Қашқадарё вилояти Шаҳрисабз шаҳридаги Амир Темур хиёбонида ўтказилган тарғибот тадбирида ҳам партия вакиллари, Олий Мажлис Қонунчилик палатаси ва маҳаллий Кенгашларга кўрсатилган номзодлар, маданият ва санъат соҳаси вакиллари, экофаоллар ҳамда минг нафарга яқин аҳоли иштирок этди.

Тадбирда партиянинг сўнгги йиллардаги самарали фаолияти ва бугунги кунда илгари сураётган ғоялари ҳақида батафсил маълумот берилди.

– Глобал дунёда кузатилаётгани каби мамлакатимизда ҳам экология билан боғлиқ муаммолар кучайиб бормоқда. Бу борадаги ҳолатни мақбул изга солиш учун, бир томондан, иқтисодий аҳволни изчил яхшилаш талаб этилса, иккинчи томондан, халқимиз орасида қадимдан маълум бўлган экологик маданиятни тиклаш, илмий асос­ланган ечимларни топиш талаб этилади.

Биз мамлакатимиздаги ҳар бир ҳудуд шароитини инобатга олиб, тажрибали олимларнинг хулосаларига таянган ҳолда айнан мана шундай муаммоларга муносиб ечим бўла оладиган аниқ таклифларни илгари суряпмиз.

Дастуримизда белгиланган ҳар бир вазифа барчамизнинг соғлом атроф-муҳитга эга бўлишимиз, мусаффо ҳаводан нафас олишимиз, тоза ичимлик сув, хавфсиз ва экологик тоза озиқ-овқат истеъмол қилишимиз, келажак авлодларимиз учун муносиб Ватан қолдиришимизга хизмат қилади.

Халқимиз ҳаётини янада фаровон қилишга қаратилган ушбу улуғ мақсадларни амалга ошириш фақат бизнинг қўлимиздан келади! Шу боис халқимизни бўлажак сайловларда партиямизни қўллаб-қувватлашга чақирамиз, – деди Ўзбекистон Экологик партияси Қашқадарё вилоят кенгаши раиси Носир Ҳалимов.

Оммавий тарғибот тадбирида партия вакиллари ва депутатликка кўрсатилган номзодлар томонидан айтилган таклифларни тадбир иштирокичлари олқишлар билан қарши олишди.

Умуман, ўтказилаётган бу каби оммавий тадбирлар партиянинг сайловолди фаолиятининг муҳим қисми, шу билан бир қаторда халқ билан яқинлашишнинг ва биргаликда янги ўзгаришларни амалга оширишнинг мустаҳкам пойдевори саналади. Бундай оммавий мулоқотлар фуқаролар билан бевосита алоқа ўрнатиш, партиянинг асосий ғоялари ва мақсадларини тушунтириш, шунингдек, сайловчиларнинг муаммолари ва таклифларини тинглаш имконини беради. Тадбирларда иштирок этиш, жамоатчиликни партиянинг сиёсий позицияси билан таништириш, уларнинг сиёсий ҳаётидаги иштироки ва овозлари муҳим аҳамиятга эга.

Оммавий тадбир давомида партиянинг кўплаб соҳа ва йўналишларга оид амалий таклифлари ҳақидаги ғоя ва шиорлар йиғилганлар томонидан қизғин қўллаб-қувватланди. Шунингдек, кўплаб ёшлар партия сафига қўшилиш истагини билдиришди.

Шаҳруза САТТОРОВА,

«Oila va TABIAT» мухбири