«Ўзбекистон – 2030» стратегиясида белгиланган вазифаларни жорий йилда амалга ошириш бўйича давлат дастури лойиҳаси экологияга доир ҳамма соҳани камраб олгани билан аҳамиятлидир. Уни ҳаётга татбиқ этишда, амалга оширишда ва режа ишлаб чиқишда яшил томойиллар асосида тажриба тариқасида бешта туман қаторида Амударё тумани ҳам борлиги қувонарлидир.

Менинг таклифим шундан иборатки, лойиҳага киритилган вазифаларнинг бажариш йўлларини янада аниқроқ белгилаб кўрсатиш керак.

Туманимизда иккита пластикни қайта ишлаш кичик корхонаси бор. Улар ўзлари пластик маҳсулотларни йиғиб, ўзлари маҳсулот ишлаб чиқармоқда. Уларга хомашёни тўп­лаш ва етказиб бериш ҳамда корхонани кенгайтиришда ҳар томонлама ёрдам бериш лозим.

Кўп йиллардан буён тадбиқ қилиниб келинаётган «Яшил макон» дастури доирасидаги тадбирларнинг бажарилишига эътиборни кучайтириш лозим. Ҳозирда кўчат экиладиган ерлар экишдан уч-тўрт кун олдин тайёрланмоқда. Аслида камида бир ой олдин текислаб, суғориб қўйиш лозим. Асосан, сув келиш йўлларига эътибор берилмай, бўш ерларга кўчат экилаётган ҳолатлар ҳам учрайди. Кўчат экилгандан кейин парваришига баъзида етарлича эътибор берилмаётгани ҳам бор гап. Мониторинг бор, лекин масъуллар жавоб бермаяпти.

Дарҳақиқат, кўчат етиштирадиган корхоналарни ва якка тартибдаги тадбиркорларни қўллаб-қувватлаш лозим. Негаки, аксарият кўчатфурушлик қилаётган тадбиркорларнинг дебиторлик қарзлари кўпайиб кетган. Баҳор ва куз фасли келса, катта-катта ташкилот ва корхоналар улардан насияга кўчат олиб, пулини қайтармагани эвазига бундай қарздорлик миқдори ўсиб бормоқда. Тадбиркорларнинг аксарияти додини кимга айтишни билмай ўтиришибди.

Кўрсатилган ушбу камчиликлар ҳал қилинмас экан, туманимиздаги экилаётган кўчатларнинг униб чиқиш кўрсаткичи, афсуски, 30 фоиздан ошмайди.

Саъдулла СОДИҚОВ,

ЎЭП Амударё туман кенгаши раиси