Бразилиянинг Сан-Паулу болалар шифохонаси ойналарини тозалаётган маҳаллий компания ишчилари бемор болаларга қувонч улашиш учун мультқаҳрамонлар кийимини кийиб олишди. Бу улар учун кутилмаган совға бўлди.

Польшада Краков технология университети талаба-қизлари инсонпарварлик хайрия тадбири ўтказди. Тадбирда қизлар сочини қирқиб, кимёвий терапиядан ўтган қизалоқлар учун соч-париклар тай­ёрлаш мақсадида туҳфа этишган, дейилади Interfax.ru хабарида.

Вьетнамнинг Винь Фук провинциясида 7,1 кило­грамм вазнли паҳлавон чақалоқ дунёга келди, деб хабар бермоқда РАА «Новости». Туғуруқ жарроҳлик йўли билан амалга оширилган. Баъзи хорижий ОАВлари уни дунёдаги энг улкан чақалоқ, деб атамоқда.

Покистонда денге безгаги тарқалишининг олдини олиш мақсадида вирус ташувчи чивинларга қарши махсус кимёвий воситалар аҳоли пунктлари, кўчалар ва одамлар гавжум ҳудудларга пуркалмоқда.

Ҳиндистоннинг Химачал-Прадеш штатида улкан кўприк қоқ иккига бўлиниб кетди. Фожиа пайтида кўприк устида ҳаракатланаётган ­енгил автомобиль ва мотоцикл дарёга қулаб тушган, оғир юк машинаси эса кўприк устида қолган, дейилади Indiadaily.ru хабарида.

Interfax.ru хабарига кўра, Испаниянинг миллий трассасида даҳшатли йўл транспорт ҳодисаси содир бўлган. Ўнлаб юк ва енгил автомобиллар тўқнашуви оқибатида 13 киши ҳалок бўлган.

Япониянинг марказий ва шарқий ҳудудларига улкан талафот келтирган «Лан» тўфони бирмунча пасайиб, Тинч океани томон ҳаракатланмоқда. Ҳукумат аҳолини сел ва кўчкилар хавфидан огоҳлантирмоқда.

Украинанинг Коростень шаҳрида фавқулодда вазиятлар вазирлигининг 60 нафар ходими 370 килограмм вазндаги аёлни уйидан эсон-омон олиб чиқиш тадбирини ўтказди. Икки соат давом этган тадбирдан сўнг 39 ёшли бемор тез ёрдам автомобилига чиқарилди.

ЭГИЗАКЛАР БАЙРАМИ

Минскда Оналарни ардоқлаш ҳафталиги доирасида «Қўшалоқ бахт» номи остида эгизаклар фестивали бўлиб ўтди.

ТАЛАБА — ПЕНСИОНЕРЛАР

Бугунги кунда Хитойда 60 ёшдан ошган кексалар сони 230 миллионни ташкил этади. Уларнинг тахминан 7 миллиони университетларда таълим олади, дея хабар тарқатди «Синьхуа» агентлиги.

«АҚЛЛИ» ЎРИНДИҚЛАР

Дубайда полиция участкаларига қуёш батареялари билан ишловчи «ақлли» ўриндиқлар ўрнатилмоқда, дея хабар тарқатди trend.az. 

ДУНЁ ДАРАЖАСИГА ЕТИШИШ УЧУН…

Ҳиндистон ҳукумати келгуси беш йилда 10 хусусий ва 10 та давлат университетида таълим сифатини ошириш ҳамда дунёдаги машҳур олий ўқув юртлари қаторидан жой олиш учун 1,5 миллиард доллар маблағ ажратади, дея хабар тарқатди «Нью-Дели» нашри.

ЙИЛИГА 14 МИЛЛИОН БОШПАНАСИЗ

Зилзила, тўфон ва бошқа турли табиий офат оқибатида ҳар йили Ер юзида 14 миллион одам бошпанасиз қолмоқда. Бу ҳақда БМТнинг табиий офатлар хавфини камайтириш борасидаги янги ҳисоботида келтирилган.

ОРОЛЛАР «ҒОЙИБ» БЎЛМОҚДА

Глобал исиш туфайли 2100 йилга бориб дунё океанларининг сув сатҳи 1,3 метрга кўтарилиши мумкин, дея хабар тарқатди РАТА-ТАСС.

ПОЛЬШАДА КИБЕРМУДОФАА

Польша қуролли кучлари тизимида тамомила ­янги — кибермудофаа қўшин тузилмаси ташкил этилди. Бу ҳақда мамлакат мудофаа вазири А.Мачеревич киберхавфсизликка бағишланган форумда маълум қилган.